EDITORYAL - Tawo ra ang mohukom

Senador Mocha Uson! Maayo ba nga paminawon? Angayan ba siya sa mao nga posisyon nga maghimo og mga balaod? Tingali, sa mga followers niya sa iyang blogs, wala’y problema, apan sa uban kaha? Daghan kaayong pangutana bahin niini ug dali dayon kaayong miisa ang mga kilay sa mga tawo pagkadungog niining balitaa dihang si Speaker Pantaleon Alvarez mianunsyo dinhi sa Sugbo sa mga posibleng kandidato pagka senador nga ituboy sa PDP-Laban sa eleksiyon unya sa 2019.

Si Uson nisikat tungod sa iyang mga seksi kaayong sinayawan ug ning bag-o gipasanginlang nagpakatap og mga fake news, ug lunod-patay nga tigpanalipod sa presidente isip Presidential Communications Operations Office Assistant Secretary.

Dili pa siguro angay nga hukman dayon si Uson sa pagkakaron. Mahimong daghan siyang nahimo nga sayop kaniadto nga wala mauyoni sa mga tawo.

Klaro kaayo si Presidente Duterte nga uyon siya nga si Uson modagan pagka senador kay sa iya pa nga pamulong, ang mga tawo maoy modesisyon kon ila ba kining botaran o dili. Mahimong dili kauyon ang mga tawo kon sa ilang tan-aw dili maayong sumbanan sa kabataan si Uson, apan kon padaugon g’yud siya pinaagi sa piniliay, unsa may mahimo sa mga dili ganahan kaniya?

Gawas pa niini, ang importante g’yud mao nga bahala kon kinsa pa ang mabutang sa pwesto, basta siguro ug tinud-anay lang moserbisyo, mao na ang gikinahanglan sa katawhan. Mag-unsa man kanang hitsas kaayo, ug maayo kaayo ang imahe sa gawas ug taas og background sa politika, apan inig lingkod sa pwesto dili motrabaho ug magsige lang hinuon og pamolitika ug padato sa kaugalingon.

Dili pud mabasol ang mga Pilipino nga mabalaka kay aduna man sila’y mga kasinatian kaniadto nga diha’y mga sikat nga personalidad nga nakalingkod sa pwesto apan wala may nahimo ug ang uban magsige pa og palta sa pagtambong sa sesyon.