EDITORYAL - Bakunang makamatay?

Makapahadlok sa mga ginikanan, nga adunay mga masuso nga wala pa makakompleto sa mga bakuna, ang nahitabo sa duha ka masuso nga nangamatay diha sa Barangay Pajac, Dakbayan sa Lapu-Lapu. Natural g’yud sa mga hingtungdang ginikanan nga ang ilang reaksiyon nga magduda ug ilang mapasanginlan ang bakuna, kay kon sila pa ang pasultihon, pwerte pa nga kiata ug himsog kaayo ang ilang mga anak nianang adlawa sa wala pa maturoki sa bakuna nga pentavalent vaccine.

Ang maong bakuna proteksiyon unta sa mga bata gikan sa daghang matang sa sakit, sama sa Haemophilus Influenza Type-B nga maoy hinungdan sa Meningitis, Pneumonia and Otitis, whooping cough, Tetanus, Hepatitis B ug Diphtheria. Lisud kaayo dawaton sa mga ginikanan ang nahitabo kay ang bakuna makaluwas man unta, apan nganong nahitabo kadto sa ilang mga anak? Nianang adlawa giingong kapin sa 60 ka bata ang gibakunahan, nganong silang duha ra man ang namatay?

Busa importante kaayo kining imbestigasyon nga gihimo sa Department of Health kay daghang posibleng nahimong hinungdan kon nganong naingon niadto ang nahitabo. Basin sa pamaagi ba kaha sa pagbakuna, pagpreparar sa mga gamit o medisina sa pagbakuna, o sa tawo nga nag-administer sa bakuna, basin aduna na’y daang sakit nga gihambin ang mga bata nga wala pa mopakita og sintomas atol sa pagbakuna kanila.

Maayong himoan g’yud kini og lawom nga pagtuon sa DOH aron sa ingon dili na masubli pa kining hitaboa. Apan dili nila angay ikasuko kining reaksiyon sa mga ginikanan kay sila maoy namatyan ug dako ang ilang pagsalig sa katakus sa mga medical personnel sa gobiyerno. Kinahanglan nga hinayhinayon sa mga taga barangay health center, City Health Office sa Lapu-Lapu ug sa DOH-7 ang pagtratar sa mga namatyan. Sila mga yano ra nga tawo nga nangita og tubag ug katin-awan bahin sa nahitabo.