Wa’y kaikag nga modawat

Tan-aw nako, angayan lang sab nga dili na idayon ni Mayor Tomas Osmeña ang paghatag og P12 milyones nga hinabang salapi ngadto sa dakbayan sa Ormoc ug sa lungsod sa San Francisco, Surigao del Norte.

Maayo na man lang unta ang P10 milyones alang sa dakbayan sa Ormoc ug ang P2 milyones alang sa lungsod sa San Francisco kay pulos nahiagum og kadaot ang maong mga dapit sa kusog nga linog.

Apan motuo ko ni Mayor Osmeña nga ingon sa wala’y pagpakabana ug wala mopakita og kaikag sa pagdawat sa mao nga salapi ang mga opisyal sa maong mga dapit.

Tiaw mo, si Osmeña mipadala og duha niya ka opisyal didto sa Ormoc aron sutaon kon unsa ang mahatag nga tabang sa siyudad sa Sugbo. Tuod, natan-aw ni kanhi konsehal Roberto Cabarrubias ug kanhi konsehal Alvin Dizon nga nanginahanglan ang Ormoc City og generator sets.

Kini aron nga mapaandar nila pagbalik ang water pumps nila nga wala na moandar kay ang ilang suplay sa kuryente apektado sa linog. Ang dakbayan sa Sugbo maoy nag-canvass sa gikinahanglan nga generator sets.

Ang himoon na lang unta sa mga konsehal sa Ormoc City mao ang paghimo’g resolusyon nga magtugot sa ilang mayor nga modawat sa donation nga P10 milyones gikan sa dakbayan sa Sugbo.

Giawhag na sila nga dad-on kining mao nga dukomento dinhi sa dakbayan aron ma-release na kanila ang tseke, apan unsa’y gihimo nila? Giingnan lang sila si Dizon nga ipadeposito ra ang kuwarta sa bank account sa Ormoc.

Uy, mura man og wala sila’y kasinatian sa pagpadagan sa kagamhanan nga dili man makadawat og mga donasyon ang usa ka local government unit (LGU) kon ang mayor dili hatagan og pagtugot sa iyang legislative body. Porbida.

Karon, ang mayor sa Ormoc nga si Richard Gomez miingon na nga mohimo na og resolusyon ang konseho nga magtugot kaniya sa pagdawat sa donasyon. Karon na lang? Kadugay gud? Kon wala mopahibalo si Osmeña nga dili na idayon ang paghatag sa donasyon, wala sila magkara-kara sa paghimo’g resolusyon?

Kamong mga opisyal diha sa Ormoc City, apil ang mayor, angay’ng kasuk-an sa katawhan diha. Moingon ko nga apil ang mayor kay nganong wala man siya makaawhag sa konseho sa paghimo’g pagtugot kaniya, kon ang konseho nagmika sa ilang katungdanan?

Ingon usab tingali niini ang kapakloy sa mga opisyal sa San Francisco, Surigao del Norte nga wala magtagad aron makuha ang P2 milyones nga idonar unta sa siyudad.

Karon, ihatag na lang kini ngadto sa pamilya sa mga sundalo ug polis nga nangamatay sa gubat sa Marawi City.