Subra na kining mga militante

Bilib ko sa pasensiya sa atong kapolisan sa ila nga pagkontrolar sa mga abusado nga raliyesta sa unang adlaw sa katiguman sa mga heads of states sa gipahigayon nga Association of Southeast Asian Nations summit didto sa kaulohan.

Ilaha g’yud nga gipatuman ang maximum tolerance bisan pa man sa grabe nga pasingit sa mga demonstrador kinsa miguba na sa mga barrier kay gusto lagi nga mosulong sa mga restricted area aron molawgaw sa katiguman.

Kay kon mikubit pa ang kapolisan ug mipatol sa grabe nga abuso sa mga militante, sila ra usab ang hasngan sa mga batikos.

Pildehon gayud sila sa mga pahaba niining mga demonstrador, kansang mga kawsa ang wala gayu’y kapaingnan.

Sa ato nga nakita, sukad pa sa unang panahon, wala gayu’y katagbawan kining mga militante. Bisan kon si kinsa pa ang nagkupot sa renda sa pangagamhanan, wala gayu’y kahumanan kining ila nga sing-al batok sa mga anaa sa poder.

Sa nagsingabot pa ang eleksiyon kaniadtong Mayo 2016, haska nila nga panghimaraot sa administrasyon ni Aquino nga napuno kuno sa corruption.

Gani daghan kanila ang misuporta man sa kandidatura ni Mayor Rodrigo Duterte.

Apan karon nga turno na usab ni Duterte pag-okupar sa palasyo, padayon ang ilang pagsiyagit sa kadalanan, ug bisan unsa na lamang nga isyu ang ilang ihapak niining kasamtangan nga gobiyerno aron lamang makapadayag sa ilang yangungo.

Tungod niini, daghan kanato ang nagtuo nga gihimo na hinuon nga panginabuhian niining pipila ka mga militante ang pagwaldas sa kadalanan.

Basin tinuod siguro ang taho nga magdawatan sila’g pundo gikan sa ubang kanasuran aron pagpadayon sa ilang kawsa.

Hinuon, ang ilang sige og pagsinggit sa kadalanan kabahin man sa proseso ilalom sa kagawasan sa libre nga pagpadayag sa mga yangungo.

Kini tungod lagi kay demokratiko man nga pangagamhanan ang atong gisagop.

Apan subra usahay kining gipakita sa mga militante, kinsa nagpakaaron-ingnon nga mao kuno’y nagdala sa tingog sa labing ubos nga sektor sa katilingban.

Kini tungod kay pulos lamang sila pagpanghagit sa kagamhanan.

Angayan lang nga pahugtan sa otoridad ang pag-deal niining mga demonstrador. Klaro nga daghan sila og nalapas matag waldas nila sa kadalanan.

Pulos lang panglawgaw ang ilang kawsa nga wala g’yuy ikatabang alang sa kalamboan sa nasud.