Unsaon nga makatigum og enerhiya (2)

* Pagpugong sa dili angay kaonon — Ang pagpatuyang sa bisan unsa’y kaonon, nga imbes molagsik, maluya hinuon kay wala mogana ang oxygen o enerhiya, gumikan sa kakulian sa sistema sa digestion ug sa nervous system. Busa magpili og masustansya nga pagkaon nga makatigum ka og enerhiya.

* Iron — Ang pag-inom o pagkaon nga nagbaton og daghang ‘iron’, usa sab ni sa paagi nga makabaton ka’g daghang enerhiya nga ang oxygen, ikaapod sa tibuok lawas nga dalhon sa sirkulasyon sa dugo.

* Molakaw sa gawas — Ang usa ka estudyante nga nigawas nga nagpahayahay o nagparelaks sulod sa 20 minutos, mas abtik pa kaysa niadtong tua lang permi sa kuwarto. Kini segun sa panukiduki sa University sa Rochester. Matud pa, ang kahayag sa adlaw, mopagana sa ‘serotonin’ sa utok, aron pataason ang maayong modo (good mood) ug ang lebel sa atong enerhiya.

* Mokaon og liso sa ‘Chia’ —Sa pagtuon ni Paul Bragg sa duha ka grupo, nadiskubrehan nga ang gipakaon og liso sa chia, mas puno sa enerhiya, kay mao la’y nakaabot pagtungas sa bukid nga mas paspas og upat ka oras ang gikusgon, itandi sa laing grupo nga lainlain lang ang gikaon, naluya ug wa g’yud makalahutay.

Kaniadto matud pa, ang karaang Aztecs ug Mayans, sa ilang lagyong mga panaw, magdala g’yud kanunay og liso sa chia, nga maoy nakahatag nila og kusog para makaseguro nga hamugaway nga makaabot sa ilang padulngan.

* Matulog 6-8 ka oras sa gabii — Kon makatulog ka og 30 minutos gikan sa paghigda nimo, senyales ni nga maayo ang imong pagkatulog. Apan kon inighigda mo, makatulog ka dayon, o kaha sa trabahoan, sintomas kini sa wa’y maayong kinatulgan, kay nagluya nga kaugtason tungod sa kakulang sa kusog o enerhiya.