Gustong himoong beneficiaries ang mga step children
Dear Atty. Divine,
Duna ko’y pangutana labot sa anak sa akong asawa sa iyang pagka dalaga. Duha ni sila nga pulos menor de edad ug anaa kini nagpuyo nako ug ako na ang nagpaeskwela nila.
Ang apelyido sa mga bata mao ang apelyido sa ilang inahan. Ang akong pangutana kon mahimo ba nako sila nga ikarga isip akong mga beneficiary sa SSS uban sa akong asawa?
Unsay angay nako nga buhaton aron mahimo nako sila nga mga beneficiary? Daghang salamat. — Pedro
Dear Pedro,
Ang mga bata mamahimo lang nga malakip sa imong SSS isip imong mga beneficiary kon imo silang sagupon pinaagi sa pag-file og Petition for Adoption sa korte.
Kon ma-grant sa korte ang imong adoption, ang mga bata makonsiderar na nga imong mga anak ug mamahimo na sila nimong ikarga sa imong SSS isip mga beneficiary.
Pagkakaron dili g’yud nimo sila maapil nga beneficiary kay wa man moy blood relation. Ang imo ra g’yud nga asawa ang mabutang isip beneficiary sa SSS sa pagkakaron.
Busa mas maayo nga imong sagupon ang mga bata aron ang ilang apelyido mabalhin na sab sa imong apelyido. Angayan sab nga moduol ka og abogado aron imong mapangandaman ang mga dokumento nga imong gikinahanglan para sa adoption. Thanks and God bless. — Atty Divine
* * *
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.
- Latest