Kabilin ni Yolanda

Gihandom kaniadtong Nobiyembre 8 ang pag-igo sa gamhanang bagyong Yolanda sa kasaysayan sa mga katalagman, diin grabeng naapektohan ang mga dapit  sa Samar ug Leyte.

Apan kumusta naman ang mga nabiktima human sa upat ka tuig sa maitom nga yugto sa ilang kinabuhi?

Kini akong gipangumusta atol sa tulo ka adlaw nako nga pag-estar sa dakbayan sa Tacloban, diin ako nanukad sa akong paghatod sa mga balita sa Eastern Visayas isip co-anchor sa Balitang Bisdak.

Halos wala na’y lama sa makalilisang nga talan-awon sa palibot sa Tacloban nga kanhi gigusbat sa bagyong Yolanda. Nakapatindog na sila og mga bag-ong pinuy-anan ug mibalik na sa normal ang ilang kinabuhi ug panginabuhi.

Nagpakita lang kini nga nakabarug na ang katawhan gikan sa grabeng pagsulay sa ilang kinabuhi.

Apan sa pagsuroy nako sa pipila ka mga dapit, nakita nako ang mga proyektong pabalay sa gobiyerno sa nakalabay’ng administrasyon nga nausik lang.

Adunay mga townhouses nga gipatukod alang sa mga biktima nga wala mapuy-i kay wala’y tubig ug wala’y kuryente, gikaon na sa taya ang mga atop.

Samtang may gitawag usab nga mga butterfly houses nga 50 ka units, apan siyam na lang ka pamilya ang naka-survive sa pagpuyo tungod sa kalbaryo sa ilang sitwasyon.

Gani ang mga molupyo malipay kon mag-ulan kay makasawod sila og tubig nga magamit. Mas delikado ang pag-jumper nila sa kuryente direkta sa poste aron makasuga lang.

Dili unta kini mahitabo kon kinasingkasing ang pagtagad kanila sa atong gobiyerno. Nakabangon naman ang kadaghanan sa mga biktima ni Yolanda apan ang uban nagpabilin gihapon nga wala’y kasegurohan.

Nakabangon man ug nakabarug na, apan magpabilin gihapon sa ilang galamhan ang mapait nga yugto sa ilang kinabuhi.