Sa kaulohan, ilegal ang Angkas ug Habal-habal

Sa ato na nga nahisgotan dinhi, ang buhatan sa mayor sa Makati City mitak-op sa Angkas Training Center ug sa ilang buhatan kay wala sila’y business o mayor’s permit.

Karong bag-o usab, sa Taguig City, laing driver sa Angkas ang gidakop gumikan sa pagka-wala’y franchise, ug natural, wala’y business permit.

Maora og buy-bust operation ang gihimo ni Atty. Aileen Lourdes Lizada, board member ug spokesperson sa LTFRB. Nagpa-book siya pinaagi sa Angkas app, misakay gikan sa McKinley Hills, nanaog sa 5th Avenue sa Bonifacio Global City, diin naghulat ang mga LTFRB operatives nga midakop sa driver.

Didto karon sa kaulohan gipanghingusgan sa LTO ug Highway Patrol Group ang operation batok sa mga motorsiklo nga gipamasaheroan.

Matud sa ulohang buhatan sa LTFRB, wala’y balaod nga nagtugot sa mga motorsiklo nga gamiton sa pagpamasahero.

Ang Section 7 sa  Republic Act 4136, o ang Land Transportation and Traffic Code, mi-classify ning mosunod: 1.) private passenger automobiles; 2.) private trucks; 3.) private motorcycle, scooters, or motor wheel attachments, nga matud pa: “Motor vehicles registered under these classifications shall not be used for hire under any circumstances and shall not be used to solicit, accept or be used to transport passengers or freight for pay.”

So, klaro kaayo nga ang mga dakbayan sa Makati ug Taguig igo lang nga nagtuman sa balaod sa ilang pag-operate batok sa ilegal nga mga private motorcycles nga gipamasaheroan.

Dinhi sa ato, unsa man? Mao ra man og gi-tolerate kini sa gobiyerno, kaylagi, paghatag og kasayon sa mga sumasakay ug paglikay sa kahuot sa trapiko.

Sa ato pa, bahala na’g ilegal basta gikinahanglan ug maoy gusto sa katawhan! Kon maghisgot ta og Habal-habal ug Angkas, suspended lang una ang mga balaod sa trapiko?

Adunay mga sugyot nga kon dili man ma-legalize, kaylagi, duha ra’y ligid, at least i-regulate lang.

Kay kon ma-regulated, estriktohon na g’yud ang paggamit og helmet, both sa driver ug pasahero, ug usa ra g’yuy itugot nga pasahero, dili pareho karon nga pirme lang mag-overloading.

Kinahanglan i-regulate usab ang plite ug rota, nga karon sila’y magbuot pila ang plite, ug bisa’g asa lang moagi. Kinahanglan i-regulate usab ang kasaba sa tambutso. Ngano nga dili man ta kapatuman sa anti-noise ug sa overspeeding ordinance?

Unya, anha g’yud ni sila mag-park both side sa eskina samtang maghuwat og pasahero. Ang mga kanto maoy gihimo nilang terminal, ug kinahanglan i-insure ang pasahero.

Again, kon dili man g’yud ma-legalize, at least, ato kining i-regulate.