Unsaon nga makatigunog enerhiya (1)
Ang sagad nga buhaton sa uban, aron masustinehan ang enerhiya sa tibuok adlaw, mao ang pag-inom kanunay nga mora na’g naadik sa kape, kay lagi kuno, kini makapalagsik. OK man sab, apan duna lang kini laing epekto o say’d-epek, nga kon ma-imyun sa kape ang lawas, pirme kana maugtas nga dali kabsan sa enerhiya. Ang kakapoy o kaluyahon nga pamation, sintomas kini nga kulang kaayo ang atong enerhiya, gamay lang nga lihok magluya na nga kahilantanon.
Matud pa sa mga pagtuon, dili na kinahanglan ang kape, kay aduna na’y daghang pamaagi nga natural aron makatigum og enerhiya ang lawas nga igong magamit sa inadlaw nato nga pakigbisog sa kinabuhi. Sama sa mga mosunod;
* Katawa — Sugdi sa pagkatawa nga mahimut-anon ug malipayon, gikan sa atong pagmata hangtud na sa tibuok adlaw nga gimbuhaton, kay kini mopamenos sa stress, mogana ang ‘feel-good hormones’ nga mopabatyag kanato sa kaanindot pamation, nga lagsik ang lawas ug hunahuna, unya makapalig-on usab kini sa sistema sa atong imyun nga dili dali maluya.
* Dasiga ang kaugalingon — Ang tawo dili tapolan, naluya lang nga nainutil sa tumong ug tinguha, nga mao ang pagdasig sa kaugalingon’, niya pa ni Anthony Robbins. Ang tinuod lang, wala kita kapoyi, kulang lang sa enerhiya nga wala nato hingusgi, ang paghimo og butang nga makapadasig sa kaugalingon.
* Inom pirme og tubig — Ang kakulang sa tubig, makapahinay sa sirkulasyon, nga momenos ang suplay sa oxygen, nga maoy hinungdan nga dali ra ta maugtas sa kakapoy. Busa bisan og asa ta, magtakin og mainom nga tubig.
Angay nga 1-1.5 ka litro ang mainom kada adlaw ug labaw pa niini ang imnon nga tubig, kon pirme pakusog ang trabaho.
- Latest