Abuso sa mga magbiseklita

Kanunay g’yud ko nga makakita nga sagad sa mga tawo nga magbiseklita dili motuman sa balaod sa trapiko. Bisan og “go” pa alang sa mga sakyanan, molabang g’yud sila sa karsada nga nag-ikis-ikis ang dagan.

Kining mao nga talan-awon dili gayud maayo, apan subo lang kaayo nga dili kami managsama og panghuna-huna ug ang mga opisyal nato sa dakbayan, apil ang mga traffic enforcers diha sa kadalanan.

Naghatag og risgo sa mga motorista kining mga tawhana kay kon sila madam-agan, sigurado ko nga moreklamo sila ug magpagasto sa pagpatambal kanila sa ospital. Dili ba gud maayong himoan og ordinansa nga kampanyahan kining sayop nga buhat sa mga magsakay og biseklita?

Angay unta nga adunay ordinansa nga himoon ug ibutang nga i-hold ang biseklita sa malapason sa lagda, kon dili kini makabayad sa multa. Pinaagi niini, dili na moabuso kining mga tawo nga magsakay og biseklita.

* * *

Gilugwayan ang termino sa mga opisyal sa barangay. Ang mga tawo nalipay para niadtong mga kugihan nila nga opisyal, apan duna sa’y nagbagulbol para sa mga ligoy nga padayong makakuwarta bisan og wala’y serbisyo, dili gani motambong og sesyon.

Kinsa ba kining konsehal sa Barangay Tunghaan, Minglanilla nga wala na g’yud motambong og sesyon sa barangay? Nakadawat ko og report kabahin niini. Kinsa ba ang kapitan sa Tunghaan? Lihoka ni Capt, himoi og reklamo sa DILG kining imong konsehal.

* * *

Uy, unsa ning report nga akong nadawat? Konsehal kuno diha sa Basak, Lapu-Lapu nag-finance og swertres? Pastilan, akong awhagon ang kapolisan diha sa Lapu-Lapu nga lihoka ni. Dakpa kining maong konsehal kon tinuod man ang nadawat nako nga report.

Unya, diri sab sa Station 6 sa Cebu City Police Station sa Barangay Sawang Calero, mura’g klaro na g’yud kaayo mo diha nga nagdawat gikan sa mga illegal swertres operators kay gipasagdan ra g’yud ninyo ang kalihukan sa mga nag-operate og illegal swertres diha sa Pasil ug Suba.

Usa niining mao nga operators og illegal swertres, opisyal usab sa barangay. Siyaro og moingon mo nga wala kahibalo? Tell that to the dead marines! Maayo tingali nga pangrelibohan nimo higalang CCPO Director Joel Doria ang tanang polis diha sa Station 6.

Kon moingon mo nga wala kamo makaila, aria ko ninyo sa opisina. Apan timan-i nga kon moingon mo nga wala makaila sa mga nag-operate og illegal swertres diha sa inyong teritoryo, mas maayo tingali nga mang-resign mo pagka polis!