EDITORYAL – Mobalhin Ra ang kagubot

Maayo ang nahunahunaan ni Cebu City Mayor Tomas Osmeña nga adto na lang sa South Road Properties ipahigayon ang mga street parties atol sa Sinulog karong sunod tuig, aron mamenosan ang kasamok diha sa rota sa Sinulog Parade. Apan ang mahitabo niini, mobalhin ra ang kagubot. Samtang magkonsumisyon ang mga tindahan diha sa Sinulog route nga gustong mamaligya og mga ilimnong makahubog, mabuhi usab ang ubang mga tindahan nga mosulbong unya diha sa SRP nianang mga adlawa.

Dili mabasol ang mayor niini tungod kay makadaghan na sila nga gipasidan-an nga dili mamaligya og ilimnong makahubog ug dili maghimo og street party sa Sinulog route, apan gahi gihapon kaayo og ulo, busa mao ni ang leksiyon. Ang paghimo og street party ug ang pagpamaligya’g ilimnong makahubog duol sa rota sa Sinulog grand parade, maoy makapasamok sa kalihukan. Sigurado nga momenos g’yud ang halin sa mga balay patigayon, apan dili gihapon moubos sa naandan nilang kita.

Dili nila pwedeng himoong rason nga migasto sila og dakong puhonan para sa Sinulog ug nga maalkanse sila kon dili ibaligya ang ilang mga kinompra, kay karon pa lang daan, gipahibalo na man sa siyudad nga idili na ang pagpamaligya og ilimnong makahubog ug pagpahigayon og street parties sulod sa 300 metros sa Sinulog route. Aron dili sila makasugat og problema, tumanon na lang g’yud nila ang kamandoan sa mayor.

Bentaha niini kadtong mga tindahan nga layo sa rota kay siguro g’yud nga kadto maoy dugokon sa mga tawo nga gustong manginom ug mag-party. Apan labad kini sa ulo sa mga mobantay sa kahapsay ug kalinaw gumikan kay mabahin g’yud ang ilang atensyon kay kinahanglang bantayan nila nga rota ug ingon man sa gawas sa rota nga diin posibleng adunay mga kalingawan nga himuon ang mga establisamento.

Maayong tun-an kini daan sa siyudad ug sa Cebu City Police Office.