Gusto nga sagupon ang mga anak sa iyang asawa

Dear Atty. Divine,

Biyudo ko, ug naminyo ko og usab. Ang akong naasawa adunay duha ka anak, apan dili siya kasal sa amahan sa mga bata. Ako siya nga gipakaslan ug ang iyang mga bata nga 3-anyos ug 2-anyos, ako ang nagbuhi ug anaa kini nagpuyo uban kanamo.

Ang gidala nga apelyido sa mga bata, ang apelyido sa ilang amahan. Ang akong pangutana kon mahimo ba nga ilisan ang apelyido sa mga bata sa akong apelyido? Unsaon man ug unsa’y mga requirements? Daghang salamat. —Fred

Dear Fred,

Mahimo lang mailisan ang apelyido sa mga anak sa imong asawa sa imong apelyido kon imong sagupon ang mga bata pinaagi sa pag-file og Petition for Adoption ngadto sa korte.

Apan kinahanglan ang consent o pagtugot sa ilang biological father kon sagupon nimo ang mga anak sa imong asawa.

Kon ma-grant sa court ang adoption, momando ang korte sa pag-usab sa ilang apelyido ug ang imong apelyido mao na’y gamiton sa mga bata ug ang mga bata makonsiderar na nga imong mga legitimate nga anak, busa mahimo na usab sila nga maka-inherit sa imo unyang mga kabilin.

Adunay daghang dokumento  nga kinahanglan nimo nga i-comply ug i-attach sa imong petition for adoption. Ang maayo nimong buhaton mao ang pagduol sa imong abogado aron maandam nimo ang mga dokumento nga angayan nimo i-attach sa imong petition. Thanks and God bless. —    Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.