EDITORYAL – Revolutionary Government

Dili na ipadayon ni Presidente Duterte ang iyang mga gipamahayag kaniadto nga himuon niyang revolutionary government ang gobiyerno sa Pilipinas. Si Duterte miangkon niini sa mga tigbalita didto sa Da Nang sa Vietnam kabahin sa kusog nga panawagan sa pipila niya ka supporters nga magdeklarar niini aron sa ingon makontrol niya ang tanan ug mopaspas ang serbisyo ngadto sa publiko.

Giangkon ni Duterte nga tinuod ang gisulti ni Bise Presidente Leni Robredo sa report nga ang Armed Forces of the Philippines ug ang Department of National Defense dili mosuporta sa revolutionary government. Kaduha ra nahitabo nga nakabaton og susamang sistema sa gobiyerno ang Pilipinas. Una sa panahon ni kanhi presidente Emilio Aguinaldo (sa unang republika) ug sa panahon ni kanhi presidente Corazon Aquino. Sa panahon ni Aguinaldo, makaingon ta nga husto kadto tungod sa pagsakop sa mga Katsila ug usab sa mga Amerikano sa Pilipinas.

Sa panahon ni Aquino, rebolusyonaryo kadto tungod kay dili ordinaryo ang sitwasyon human sa People Power ug pagkalagpot sa kanhi diktador. Apan wa’y dakong kausaban nga nahitabo sa panahon ni Cory ug daghan ang mga kudeta nga nahitabo kay gusto lagi og tinud-anay nga kausaban o reporma. Wa mapalagpot si Cory, dili tungod sa iyang kalig-on ug iyang katakos modumala, kondili, tungod kadto sa mga opisyal nga nakatilaw sa gahum sa diktadoriya o nabiktima sa diktadoriya nga dili na gusto mabalik ang pagpangabuso sa gobiyerno ngadto sa katawhan.

Gawas nga mopaspas ang paghatud sa serbisyo wala man usab ibutyag sa mga namugos niini ang negatibong epekto sa revolutionary government. Apan ang militar nga may katakus pag-ilog sa gobiyerno, nasayod kon unsa ang dili maayong epekto sa maong sistema sa gobiyerno, kini siguro maoy rason nga sila mismo ang nipadayag nga dili nila kini suportahan. Kon hinay ang serbisyo, kini maoy tarungon.  Dili kay patyon ang tibuok lawas kay nasakit ang kumingking.