Banat ( Leaderboard Top ), pagematch: 1, sectionmatch: 1

Sagpa sa pagpanglaktod

Labing sipa nga sagpa ang nahiagoman ni Presidente Rodrigo Duterte karong semanaha dili gikan sa gikasilagan kaayo niya nga mga kaatbang sa politika, kon dili gikan sa iyang labing sinaligan nga mga tinudlo.

Gitataw nila ni Defense Secretary Delfin Lorenzana ug Armed Forces of the Philippines (AFP) Chief, General Rey Leonardo Guerrero nga:

Dili sila mopaluyo sa bisan unsa nga pagsuway sa pagtukod og revolutionary government; ug

Dili sila mopaluyo sa bisan unsa nga mga lakang sa paghulga sa demokratikanhon nga mga institusyon nga gipanalipdan sa 1987 Constitution.

* * *

Nakadugang sa kasakit sa deklarasyon nila ni Lorenzana ug Guerrero mao nga ila ning giluwatan atubangan ni Bise Presidente Leni Robredo, nga simbako nakalimot siya mao ang ikaduha nga labing taas nga opisyal sa gobiyerno.

Dili niya kapasanginlan si Robredo nga nimaniobra nila ni Lorenzana ug Guerrero. Kay nagsuporta si Robredo sa kasagaran sa iyang programa ug nibalibad gani sa pagkuyog sa bag-o nga mga pundok nga gitukod batok sa extrajudicial killings ug ubang kontrobersiyal nga mga lakang sa iyang pamunoan. Gawas pa, wa manghimakak sila si Lorenzana ug Guerrero.

* * *

Nakadugang sa kapait sa deklarasyon nila ni Lorenzana ug Guerrero mao nga, lahi sa duha ka nagsunod nga tagdumala sa Dangerous Drugs Board (DDB), Benjamin Reyes ug Heneral Dionisio Santiago, nga sayon niya nga gitaktak tungod sa pagsukwahi niya, dili niya mapalagpot sa katungdanan ang defense secretary ug AFP chief.

Kay nagkinahanglan siya sa suporta sa AFP ug sila si Lorenzana ug Guerrero, dili si Duterte, ang tuohan sa kasundalohan. Nahibawo sab siya nga dili makabarug ang revolutionary government kon dili mopaluyo ang AFP.

* * *

Nakahingpit sa kapait sa gibati ni Presidente Duterte mao nga bisan kadaghan na nga gisubli-subli ang plano pagpabarug sa revolutionary government, nga naglakip sa pagpapas sa Kongreso ug sa Korte Suprema, wa maglumpayat ang katawhan sa pagsuporta.

Hinunoa, labihan kamingaw sa mga protesta nga gilusad sa iyang mga dumadapig sa kaulohan ug ubang bahin sa nasud aron pag-apura sa pagtukod sa revolutionary government.

Maglisod pagdawat si Presidente Duterte nga sa nahibilin nga lima ka tuig sa iyang termino kinahanglan siya nga mosubay sa mga lagda sa demokrasya.

 leo_lastimosa@abs-cbn.com.

  • Follow Us: