Banat ( Leaderboard Top ), pagematch: 1, sectionmatch: 1

Mirisi sa pagpalabilabi

Mga suod ni Vic Ong, tag-iya sa Vic Enterprises nga gihulga nga kandadohan ni Cebu City Mayor Tommy Osmeña human sa duha ka semana nga lugway sa pagpamutos, nipasalig nako nga buotan siya ug dili garbuso.

Matud nila nga naikog pag-ayo si Ong sa kahasol nga namugna sa ilang negosyo sa trapiko ug sa ilang kasilinganan.

Gitataw sab nila nga naningkamot ang kompaniya sa pagmenos sa kaabog sa ilang operasyon ug sa pagkabara sa trapiko sa pagsulod-gawas sa ilang mga trak sa ilang compound. Gani gikagisan dayon nila ang nagsapaw-sapaw nga lapok sa kadalanan nga ilang gigamit.

* * *

Mahimong gawas nga buotan si Ong, nangandam pa g’yud daan alang sa kinabuhing dayon. Nabantang sa kapin sa 230,000 nga nikuyog sa Grand Marian Procession pagtimaan sa ika-100 ka tuig nga sumad sa katapusang pagpakita sa Mahal nga Birhen sa Fatima, Portugal niadtong Oktubre 13 ang namungingi nga tarpaulins sa center island sa Osmeña Blvd. nga nagpahibawo sa hingpit nga pagsuporta sa Vic Enterprises sa relihiyuso nga kalihokan.

Mahimong ang langit maoy labing nasuheto sa uban pa nga maayo niyang mga buhat. Apan angay gihapon sila nga palayason gikan sa Mabolo.

* * *

Dihang nagsugod na og tubo ang ilang negosyo pipila ka tuig ang nilabay, gitambagan si Ong sa pagpalit og mas dako nga luna sa hawan pa nga reclamation area sa Mandaue City. Apan wa siya mopatuo.

Hinunoa, namalit hinuon sa kasilinganang mga luna sa Mabolo pagpahiluna sa nagkalapad nilang patigayon. Angay’ng pahalipayan si Ong sa paglambo sa iyang negosyo.

Apan angay’ng paninglan sa pagpalabi sa kuwarta kay sa kahapsay sa kadalanan ug kahimsog sa iyang mga silingan.

* * *

Gawas nga gisigaan sa mata sa usa sa mga anak ni Ong si Mayor Osmeña, nga maoy garantiya nga maserado g’yud sila, nipasidaan sila nga ang paghunong sa dako nilang operasyon: Makapaapiki sa construction boom sa Sugbo ug makapagutom sa kaliboan ka tawo, kansang panginabuhi nagsandig nila.

Dili mabalda ang mga konstruksiyon sa Sugbo ug kasilinganang mga isla kay naghinam-hinam na ang ubang hardware shops paghulip sa bisan unsang haw-ang sa suplay.

Ug dili sila manaktak og mga trabahante kay igo ra nga ibalhin ang operasyon sa napalit na nga mga bodega sa habagatan ug amihanang Sugbo.

leo_lastimosa@abs-cbn.com.

  • Follow Us: