Banat ( Leaderboard Top ), pagematch: 1, sectionmatch: 1

Kriminal o inosente?

Naduhigan og pagduda kon tinuod ba g’yud, o fall guy lang ba, ang gisikop sa Mandaue City Police Office nga suspek sa pagpatay ni PO1 Mae Sasing.

Gipresentar sa MCPO ang kanhi uyab sa biktima nga si Felix Taytayan human kini nadakpan didto sa Madredijos.

Giingong gusto makig-uli si Taytayan ni Sasing apan wala kuno mosugot ug posibleng mao kini ang hinungdan nga iyang gipatay ang biktima.

Kini si Taytayan kasamtangang apprentice sa usa ka cargo vessel nga magbiyahean sa Madredijos padulong Cebu City.

Matud sa kapitan sa barko ug mga tripulante, nga kauban nila si Felix niadtong Oktubre 31 diin mao usab ang adlaw nga gipatay si Sasing.

Alas singko y media sila nahuman sa pagdiskarga sa mga kargamento sa pier 3 kauban si Taytayan, kinsa nagpundo ra sa barko tungod kay gipangkapoy na sa ilang trabaho ug nagpaabot na lang sa ilang panihapon.

Naka-record usab sa logbook si Taytayan ug naapil usab kini sa manifesto sa coast guard.

Ibutang ta lang kon nisibat si Taytayan sa barko human sa ilang trabaho alas singko y media, posible kaha nga makaabot siya sa Basak, Mandaue City aron didto patyon ang polis?

Hinuon, sa habig sa atong kapolisan, duna usab sila’y lig-ong basehan sa ilang operasyon nganong si Taytayan man ang ilang gisikop pinasubay usab kuno sa ilang mga vital witness. Kon tinuod g’yud nga si Taytayan ang kriminal makaingon kita nga mirisi niya ug mas maayong madugta siya sa bilanggoan.

Apan usa ka dakong inhustisya, dili lang sa akusado, kon dili, sa biktima mismo, kon dili, mao ang nadakpan sa kapolisan nga mihimo sa krimen.

Hinaot unta nga wala malaktud ang proseso, dili dinalidali nga aron lang ingnon nga dali kaayo nasulbad ang kaso ug manguha na lang sila og fall guy.

Nasang-at na man ang kaso sa piskaliya ug posibleng moabot kini sa korte, atangan na lang nato ang sangpotanan sa kaso. Unta, mogawas ang tinuod nga hustisya sa kamatayon ni PO1 Sasing.

  • Follow Us: