Dili lang g’yud unta gub-on

Para kanako, kon nakahasol man gani sa pag-agi sa mga tawo ang gibutang nga tanod outposts sa Barangay Ermita duol sa Carbon Public Market, ibalhin ra unta kini sa tukma nga lugar ug dili panggub-on. Apan unsaon man, gipaguba g’yud kini ni Mayor Tomas Osmeña.

Wala tingali g’yuy kaisog ang iyang mga sinaligan nga motambag sa mayor nga dili maayo ang iyang gihimo. Unya, bisan og ang mga tanod migamit na lang og mga lingkoranan nga kalingkoran nila kon kapoyon na sa pagbarug, sakmiton kuno gihapon sa mga sakop sa Probe Team.

Pastilan, unsa kaha ang sangpotan niining mao nga isyu.

* * *

Gilabhan og maayo sa mga kumentarista sa radyo ang mga imbestigador sa kapolisan diha sa Mandaue tungod sa pagtumbok nila sa usa ka apprentice sa barko nga maoy gipasanginlang mipatay niadtong polis nga nadestino sa Lapu-Lapu apan didto na sa Mandaue gipatay.

Karon, daghan na ang nagtuo nga nasipyat ang kapolisan sa ilang pagtumbok ni Felix Taytayan nga maoy suspek sa pagpusil patay ni P01 Mae Sasing. Didto ra man diay kuno sa barko si Taytayan diha nga gipatay si P01 Sasing nga iyang kanhi uyab.

Gipalutaw man gud sa kapolisan nga si Taytayan nasuko kay gibalibaran ni P01 Sasing ang iyang hangyo nga balikon nila ang ilang relasyon. Matud sa kapolisan nga usa ka adlaw sa wala pa patya ang polis, giadto pa kini sa suspek sa Lapu-Lapu.

Apan pastilan, nianang higayuna ang barko naglawig pa kuno gikan sa Bantayan paingon dinhi sa Sugbo ug ang ngalan ni Taytayan naa sa manipesto sa barko nga nagmatuod nga sakay siya.

Mas nindot tingali nga sublion sa kapolisan ang ilang imbestigasyon.

* * *

Usa ka Jose Arcillas mipadala og email kanako og miingon nga siya ug ang mga higala niyang drayber sa Mandaue City nalipay g’yud kaayo sa pagbalhin na sa opisina sa LTO ngadto sa JCenter Mall gikan sa Barangay Looc.

Nagpa-renew kuno siya sa rehestro sa iyang motorsiklo kaniadtong Martes, ug mibunok ang uwan. Nahuna-huna kuno niya nga kon ang LTO sa Mandaue didto lang gihapon sa Barangay Looc, basa g’yud sila.

Nagpasalamat si Arcillas nga usa ko sa mga sakop sa media nga misuporta sa pagbalhin sa LTO sa Mandaue ngadto sa bag-o niining nahimutangan diha sa JCenter Mall. Kon tan-aw nato angay’ng balhinon, suportahan g’yud nato.