Kinsa’y nag-away ug kinsa’y giaway? (2)

Si Cabinet Secretary Leoncio Evasco ang mibuhi og pamulong batok kang Presidential Assistant for the Visayas Mike Dino atol sa panatagbo sa pipila ka mga sakop sa Kilusang Pagbabago sa Plaza Independencia.

Matud niya nga iyang tan-awon ang reklamo sa mga Yolanda victims sa Tacloban batok kang Dino. Por dios, wala’y gahum si Evasco paglili sa maong reklamo kay gi-address kini sa Office of the President ug nahibalo siya nga ang Office of the Deputy Executive Secretary for Legal Affairs (ODESLA) ang naggunit sa mga sulat reklamo nga gi-address sa presidente.

Apan tay’m pa, siya motan-aw sa reklamo sa mga Yolanda victims batok kang Dino? Basin og nagpagoryo-goryo lang kini si Evasco ug ang iyang Kilusang Pagbabago nga siya (si Evasco) ang gitudlo nga “chairman” sa “Inter-Agency Task Force for the Unified Implementation and Monitoring of Rehabilitation and Recovery Projects and Programs in the Yolanda-Affected Areas.”

Kining maong IATF nga gitukod ni Duterte pinaagi sa Administrative Order No. 5 series of 2017 maoy makasulti unsa si Evasco sa Yolanda rehabilitation effort. Naa niya ang tanang gahum. Ubos sa maong IATF, si Dino “co-chairman” lang. Apan sa akong nasabtan, gihimo siyang co-chairman tungod sa iyang pagka-presidential assistant.

Kun mapalpak ang task force, basulon ba ang co-chairman nga nag-agad lang sa chairman? Gawas pa, adunay laing co-chairman nga si Atty. Wendel Avisado. Kini si Wendel Avisado gitudlo ni President Duterte nga maoy mo-oversee ug mo-supervise sa Yolanda Rehabilitation Project, apil na ang “management of funds and completion of the restructuring and reconstruction...” ubos sa Presidential Directive No. 0288 nga gipirmahan ni Duterte duha ka adlaw (Nobiyembre 10, 2016) human sa “verbal instruction” sa presidente ni Dino nga ibalhin ang mga biktima sa Yolanda sa bag-o nilang mga balay.

Kon adunay angay’ng ireklamo, kana mao si Evasco ug si Avisado!

Nakahibalo ba kaha ang upat ka reklamante sa Tacloban niini?

Kadtong nagpailang pari nga si Fr. Jose Elmer Cajilig nagpatoso-toso lang sab ba aron labanan ang ilang founder sa Kilusang Pagbabago sa tulobagon niini sa mga biktima sa Yolanda?

Naa man na ang AO No. 5 ug PD No. 0288, nganong dili man na ipansak sa baba sa mga taga-Kilusang Pagbabago?

Si Evasco ug Avisado ang gamhanan sa Yolanda rehab, apan ang dakdakan sa pagbasol ang presidential assistant nga sulogoon lang sa presidente?

Nganong ma-threaten man g’yud kang Dino nga wala man kaha kini umoy sa Malacañang, ingon pa ninyo?