Ang kolor sa atong ihi (1)

Ang atong ihi kon unsay makita nga kolor, indikasyon kini nga motug-an sa tinuod nga kahimtang sa panglawas. Sagad ra ba wala kita magpakabana sa pagkat-on niini basta igo na lang sa hunahuna nga makapabuhagay sa ihi. Unya raba kutob lang sa hunahuna nga mawala lang kadtong nakita niya nga kolor sa ihi nga naglain na. Unsay mga sintomas niini sa iyang nakita, wa na lang matagad.

Sa pagpangihi nato sa gawas dili nato maklaro pag-ayo ang kolor sa ihi ilabi na mopasirit lang sa suok. Hasta sab sa mga CR, nga lagumon na’g pondohan sa ihianan o inidoro, mosamot malubog lang ang kolor sa ihi.

Mas maayo kon naa ta sa balay, magtinil og kaugalingong puti nga arinola, aron inigpangihi ato g’yud nga matan-aw ang kolor niini. Ania ang kahulogan sa imong makita.    

* Tin-aw nga mura’g tubig – Timaan kini nga daghan ka’g nainom nga tubig. Mahimo kon gusto ka menusan sa igo lang nga pag-inom. Apan OK ra ni kon wala kay gipamati nga kadaot sa imong pantog.

* Lusparon nga kolor sa ‘straw’ — Ang buot ipasabot nga normal, himsog ug husto ra ang tubig sa lawas.

* Tin-aw nga pagka-‘yellow — Way kuyaw kini  kay nindot ug normal ang kondisyon sa imong lawas.

* Lagumon nga pagka-‘yellow’ — Ayaw kabalaka kay normal gihapon kini  apan dugangan pa ang pag-inom og tubig.

* May pagkalagumon ang kolor susama sa dugos — Nagpasabot nga kulang ka sa pag-inom og tubig. Kinahanglan dayon nga madugangan ang pag-inom og tubig.

* May pagka-‘brown’ susama ang kolor sa hilaw nga panit sa prutas nga tsikos. — Nagpasabot kini nga may problema ang imong atay. O kaha grabe na nga kulang sa tubig ang imong lawas. Moinom og igo nga gidaghanon sa tubig unya moduaw sa doktor kon wa’y kausaban ang kolor.