Aron kondisyon nga makatulog (2)

Nahisgotan nato kaniadtong Domingo ang bahin sa mga nutrens nga atong kunsomuhon aron kita makatulog pag-ayo, sama sa ‘tryptophan’ nga naa sa itlog, keso ug uban pa. ‘Vitamin-C’ nga naa sa orange o mga ‘citrus fruits’, nangka, latu/guso, kamunggay, broccoli ug uban pa.

* Dili mamuwaw o magpilaw — Nikompirmar ang University of Harvard Researchers, nga ang ‘blue light’ nga gikan sa laptop, selpon, computer ug uban pa nga digital gadyet, makapugong o madistorbo ang pagprodyus sa lawas og ‘melatonin hormones’ nga mopahiluna sa himsog nga pagtulog ug pagmata. May opsiyon sa gadyet kon wa’y ‘auto-off bluelight’, aron kamenosan ang kadaot niini. Mahimo nga i-download ang ‘apps’ sama sa ‘night filter’ ug sa ‘f.lux’. Mas maayo nga dili g’yud mamuwaw niini, gawas nga wa’y tarong kinatulgan, maghalap ang mga mata mo.

* Komportable nga katulganan — Kanang hayahay ang pamati kay ang atong lawas adunay proseso nga ginganlan og ‘thermoregulation’, nga mokontrol sa igo nga kabugnaw ug kainiton. Segun sa mga eksperto, naa kini sa 52F ug 68F.degrees, ang neutral nga temperatura nga makatulog. Mao nga mag-alindasay kita kon alimuot sination ang lawak-katulganan.

* Magpabantang sa adlaw — Kada adlaw bisan og sulod sa 10 minutos o labaw pa, aron pagpaus-os sa lebel sa ‘cortisol’ sa hapon, kay kon taas ta’g lebel niini, igo lang ta manghuy-ab nga maglisud nga makatulog sa kagabhion.

Mas maayo nga dunganan kini og pag-ehersisyo sa alas-7 sa buntag, mentras dili pa kaayo init ang adlaw, maglakawlakaw, mopahimulos paghanggap sa lab-as nga hangin, pagtibway sa paminsar nga magmalinawon ang atong hunahuna. Sa ingon niini, makapaabot kita’g himsog nga panglawas, nga dili dali mawad-a’g kusog, kay kanunay gikargahan sa gahum sa maayong kondisyon nga makatulog.