Laktod nga impeachment
Pormal na nga niawhag ang Malakanyang ni Supreme Court Chief Justice Maria Lourdes Sereno sa pagluwat sa iyang katungdanan. Kini bisan wa pa ang botasyon sa House of Representatives pag-impeach ni Sereno ug pagpadala sa articles of impeachment ngadto sa Senado.
Duha ang hubad sa agresibong awhag nga giluwatan sa bag-ong natudlo nga si Presidential Spokesperson Harry Roque: Una, posibleng masaligon ang Malakanyang sa iyang numero sa House ug sa Senado; apan ikaduha, posible sab nga nagduda si Presidente Rodrigo Duterte sa kamatinud-anon sa iyang mga alyado sa Senado.
* * *
Way lalis nga ma-impeach sa mga kongresista si Sereno. Gawas nga makabungog ang mayoriya ni Presidente Duterte sa House, usa sa tulo ka bahin ra sa mga sakop sa House ang gikinahanglan sa pag-impeach sa chief justice. Sa ato pa, 99 ra sa 297 ka kongresista ang kinahanglan nga modason sa impeachment ni Sereno.
Sabotan na lang nila ni House Speaker Pantaleon Alvarez ug kaubanan kanus-a mag-botasyon alang sa pag-impeach ni Sereno: Sa dili pa, o human sa pag-aprobar sa duha ka balay balaoranan sa gisugyot nga P3.767 trilyones nga budget alang sa 2018.
* * *
Samtang gihukngay na sa mga senador ang mga lagda sa impeachment trial, kon maduso g’yud ang articles of impeachment batok ni Sereno, kasagaran nila nipalabi nga unahon ang 2018 budget ug nga unya na sa Enero sa Bag-ong Tuig sugdan ang husay.
Mas apurado ang mga kongresista. Sa wa pa matudlo sa Malakanyang, si Roque masaligon nga ma-impeach na si Sereno karong buwana, ug makasugod na ang impeachment trial sa Senado karong Disyembre.
* * *
Mas dako nga mayoriya sa mga senador ang gikinahanglan aron pagkonbikto ni Sereno, duha sa tulo ka bahin (2/3). Samtang unom ra ang mga senador nga klarong naa sa oposisyon, may sukaranan si Presidente Duterte nga mabalaka kon tinuod ba nga lunod-patay ang mga senador sa administrasyon.
Naglungutlungot pa siya hangtod karon sa resolusyon nga nagkondenar sa extrajudicial killings (EJKs) nga gipirmahan sa 16 ka senador: Kiko Pangilinan, Bam Aquino, Joel Villanueva, Risa Hontiveros, Ralph Recto, Franklin Drilon, JV Ejercito, Sonny Trillanes, Win Gatchalian, Ping Lacson, Grace Poe, Nancy Binay, Chiz Escudero, Sonny Angara, Loren Legarda ug Leila De Lima.
* * *
- Latest
