Wise Christmas shopper

Nakatutok na ang mga tawo sa pag-abot sa pasko human sa kalag-kalag. Niadtong nakalabay’ng Biyernes, naagian nako ang usa ka tindahan nga namaligya og Christmas decoration didto sa Carbon nga gidagsa na sa mga mamalitay.

Dili lang retail, kon dili, wholesaler usab diay sila hinungdan nga didto kanila mangompra ang kanang mga gagmay’ng negosyante ug mas barato ang ilang presyo itandi sa mga dagkong tindahan. Mas makabarato kon dinaghan ang paliton.

Bitaw, usa lang sila sa mga tindahan nga dagsaan sa mga wise shoppers kinsa gustong makadaginot sa ilang budget.

Kon magkugi lang diay pagpangita og mga alternatibo nga tindahan nga kapalitan nato og mga barato, makakita g’yud diay kita og kapilian.

Kasagaran na gud karon didto naman sa mga mall mag-shopping kay bugnaw ug safety usab. Hinoon, mas convenient sa mga mall kay naa naman ang tanan ug hamugaway usab ang parking area.

Gipangutana nako kon luwas ba ang mga produkto nga gibaligya sa Carbon area. Gipakita ko sa tagdumala sa Import Commodity Clearance, kon ICC mark nga nagpasabot nga luwas ang ilang mga Christmas lights.

Dili ang presyo, kon dili, ang safety sa mga produkto ilabi na sa Christmas lights ang labing importante kay usa ka sipyat lang mosangpot kini sa disgrasya sama sa sunog nga sagad mahitabo panahon sa Yuletide season gumikan sa mga substandard nga dayan-dayan.

Mas wise shopper ang mga tawo kon ang atong tan-awon, dili lang ang presyo, kon dili, ang atong kaluwasan ug sa atong mga silingan. Kadtong wala pa kapamalit og mga adorno sa pasko, pamalit na mo samtang dili pa kaayo huot ang mga tawo sa suki ninyong mga tindahan, mall man o bisan asa nga baratilyo.