Jeepney modernization

Nindot nga mga plano, giingon nga for the greater good of the majority. Sa ato pa, alang sa kaayohan sa kinabag-ang bahin sa mga sumasakay nga nagsalig sa mga jeepney nga giisip nga poor man’s ride.

Ato na ning nadaklitan paghisgot dinhi, uban sa panghinaot nga ang mga maayong laki natong mga eksperto kunohay sa mga panakayan sa kadalanan ilang i-consider ang mga repercussions niini, sama sa matang sa mga sakyanan nga ilang ipuli sa mga jeepney nga ma-afford sa mga sumasakay.

Apan, sumala sa mga prototype o sample sa mga modernong jeepney nga ilang gipakita, tan-aw nako, samtang nindot kaayo, air-conditioned, ang mga lingkoranan baga’ kaayo’g upholstery, ang design sa sulod pareho na og usa ka van o mini bus.

Ang matag unit, mobili og P1.2 million, tapus i-deduct ang subsidy gikan sa gobiyerno. Maka-afford ba niini ang mga gagmay’ng jeepney operator? Labing seguro ang maka-afford niini mao ang mga dagkong operator sa mga passenger buses, taxi, ug ang mga operator sa Grab ug Uber.

Asa na man punita ang mga gagmay’ng jeepney operators? Ug unsaon na man ang mga gi-phase out nga mga karaang jeepney? Ipatimbang na lang nga barato na ra ba kaayo karon ang palit sa mga nanag-iya’g junkshops?

Ug inig-operate na niining mga modern PUJs, pila man unya ang mga plitehan niini? Maka-afford ba kaha ang mga sumasakay niini?

Of course, usa sa mga kaayohan nga atong maani niining pag-modernize sa mga jeep depasahero mao ang pagkamenos na unya sa air pollution nga atong mahanggap matag adlaw diha sa kadalanan.

Kay kining gilaraw nga mga modern passenger jeeps, either battery operated or motubil sa giingon nga clean or pollution free nga diesel. Sa mga pagtuon nga gihimo, nakita nga ang air pollution, nga giisip nga silent killer, maoy responsable sa mga premature deaths sa minilyon nga katawhan sa tibuok kalibutan.

Matud sa World Health Organization (WHO), ang air pollution “accounts for one third of deaths due to lung cancer, about 25 percent of deaths from heart disease, ang close to 50 percent of child deaths due to pneumonia.” Kuyaw no? Nag-unsa man lang ang Motor Vehicle Inspection Service?.

Dugang pa, ang air pollution maoy responsable sa 16% sa tanang nangamatay sa tibuok kalibutan — “three times more than deaths due to AIDS, malaria and tuberculosis combined, and 15 times more deaths than wars and other forms of violence.”

Ato kining padayunon paghisgot sa sunod natong mga lindog.