Salamat Haarlemmermeer

Ang Barangay Quiot, dakbayan sa Sugbo nakadawat og donasyon nga mga medical equipment ug supplies nga mokantidad og 10,000 ka Euro (katumbas og P600 mil) nga donasyon gikan sa Veriniging Haarlemmermeer Cebu (VHC) aron pagpalambo sa Birthing ug Health Center sa barangay.

Ang Ramon Aboitiz Foundation Inc. (RAFI) nga mao ang nagsilbi nga “implementing arm” sa proyekto maoy namalit sa gikinahanglang medical equipment ug supplies ug ang Barangay Quiot, igo na lang sa pagdawat niini.

Ang pormal nga pag-intrigo sa mga ekipong medical ug supplies gikan sa RAFI gihimo kaniadtong Oktubre 17. Ang pag-intrigo gisaksihan sa mga representante sa Veriniging Haarlemmermeer Cebu, RAFI, mga opisyal sa Sister City Program sa Cebu City Government, City Health Department ug mga opisyal sa Barangay Quiot.

Dungan sa pag-intrigo sa mga ekipos ug supplies, gihimo ang pagpirmahay sa kasabotan sa pagdumala sa Birthing ug Health Center sa barangay.

Sa nasayran, ang konseho sa Barangay Quiot migahin og P1 million gikan sa panudlanan sa barangay alang sa pagpausab sa iyang birthing ug health center aron motakdo kini sa gikinahanglan nga gidak-on. Kini aron nga mahimo na nga PhilHealth accredited ang Barangay Health Center sa Quiot ug mahimo na nga 24 oras ang iyang operasyon, aron mapalambo ang panerbisyo sa barangay ngadto sa katawhan.

Dako kaayo ang pagpasalamat sa mga opisyal sa Barangay Quiot ngadto sa VHC, RAFI, Cebu City Government ug FORGE nga maoy nahimong taytayan aron magkaabot ang dalan sa Quiot ug VHC.

Karon, kompleto na sa kahimanan sa pagpaanak ang Barangay Quiot Birthing ug Health Center, ug andam na kini nga moserbisyo bisan niadtong mga dili taga Barangay Quiot.