Harvest time sa demonyo

May nabasahan ko nga artikulo kabahin sa pamahayag sa usa ka kanhi lider sa grupo sa mga satanista sa Amerika kalabot sa pagsaulog sa halloween party sa mga tawo.

Matud niya nga mao kini ang fiesta nilang mga sumusunod ni satanas, sanglit harvest time kuno kini sa mga kalag sa mga tawo nga ilang nakabig.

Ang gitumbok nila mao kadtong mga tawo nga nagsul-ob sa mga makahahadlok nga mga sapot sama sa mga zombie, ungo, ug labaw na sa mga nagsul-ob og costume nga mura’g demonyo.

Usa kuno kini ka taas nga pagdayeg ug paghimaya sa lord of darkness kay sa paghimo sa ingon gihatag na sa tawo ang pagtugot nga maangkon sa demonyo ang iyang kalag.

Kun tinuod man kini, hilabihan g’yud diay kadaghan ang ma-harvest nga kalag ni satanas kay wala ug tuo man ang halloween party, apil na gani ang mga bata nga naay trick or treat nga gisundog gikan sa ubang kanasuran.

Matud na sa naasoy’ng kanhi satanic leader nga naglibog siya nganong ingon niini ka panatiko ang mga Kristiyanos, ilabi na sa mga Katoliko sa pag-celebrate sa halloween nga sukwahi man sa doktrina sa kahayag ang gihimong pagyukbo sa kangitngit.

Usa lang g’yud ang pangontra aron dili maapil sa pag-harvest ang atong kalag ni satanas ug kini mao ang pagpatigbabaw nato sa pag-ampo sa Ginoo.

Mahimo kini sa pagmentinar sa ka solemne sa paghandom nato sa Todos los Santos karong Miyerkules ug sa Adlaw sa mga Patay sa Huwebes.

Likayan nato ang pagsul-ob sa mga makahadlok nga halloween costume ug labaw na nga likayan nato ang pagtimbaya nga “happy halloween.” Mas maayo nga motimbaya kita pinaagi sa pag-ingon, “the Lord be with you.” Imbes party, misa alang sa kapahulayang dayon sa kalag sa mga nangamatay ang atong himoon. Ikaw segurado nga imbitado ka, motambong ka ba sa harvest time sa demonyo?