Mga pinuy-anan peligro sa disgrasya

Tulo ka balay nga gitukod daplin sa dagat sa Barangay Poblacion, dakbayan sa Lapu-Lapu ang nalusno pipila ka adlaw ang nakalabay.

Ang hinungdan mao ang paghampak sa dagkong mga bawod, dili gumikan kay naa’y bagyo, kon dili, gumikan sa pag-agi sa fastcraft sa Mactan channel.

Sa kakalit sa panghitabo, nadat-ogan sa nahugno nga dapat sa balay ang tiil sa usa ka tigulang babaye nga tag-iya sa usa sa mga nalusno nga balay.

Sumala sa bana sa naangol nga babaye, nga gikatakda na unta silang mamalhin tungod kay gabok na ang pundasyon sa ilang balay, apan naabtan g’yud sa disgrasya.

Gumikan niini, nakahukom ang Lapu-Lapu City government nga ipabalhin ang tanang mga nagpuyo sa maong dapit kay namilegro nga masubli ang disgrasya ug posibleng mosangpot na unya sa trahedya.

Ang mga apektadong residente hatagan og financial assistance sa kagamhanan sa Lapu-Lapu aron magamit sa ilang pagbalhin.

Wala’y ikahatag nga relocation site ang siyudad ngadto sa mga residente apan apil sila nga beneficiary sa tukoron nga socialize housing alang sa mga kabus sa dakbayan.

Pagka karon, giproseso na ang naasoy’ng proyekto sa city government sa pagpakig-alayon sa pribadong sektor. Ang Barangay Poblacion maoy unahon tungod kay duna may nahitabo apan isunod sa pagpaubos sa clearing operation ang mga balay nga gitukod mismo sa hunasan o daplin sa dagat nga sa higayon moagi ang mga sakayan matay-og ug malusno.

Dili man sad mahimo nga did-an ang mga fastcraft sa pag-agi tungod kay ang Mactan channel ra man ang agianan. Ang lakang sa siyudad gitumong alang sa safety sa mga tawo nga nagpuyo daplin sa dagat.

Mentras wala pa’y nakalas nga kinabuhi, mas maayo nga molihok na ang siyudad karon kay namilegro ang kinabuhi sa mga tawo.