Atraso ni Kiko
Bisan kapila na siya kurehii, nagpadayon pagpasangil si Presidente Rodrigo Duterte nga si Senador Kiko Pangilinan ang responsable sa pagdaghan sa mga bata nga kriminal tungod sa iyang pagduso sa balaod nga nipausbaw ngadto sa 15 anyos sa edad sa criminal liability.
Gawas sa pagka mayor sa Davao City, si Duterte nahimo sab nga kongresista ug busa nahibawo nga ang balaudnon (bill) dili makairog tungod lang sa usa ka magbabalaod. Mapasar lang kon dasonan sa mayoriya sa mga senador ug mga kongresista ug mapatuman lang kon aprobahan sa presidente.
* * *
Gawas pa, ang karaang balaudnon nga gipangamahanan ni Pangilinan, ang Juvenile Justice and Welfare Act (Republic Act 9344) niadtong 2006 giusab na sa Republic Act 10630 niadtong 2013 nga nagtakda sa mosunod:
Gipaubos gikan sa 15 anyos ngadto sa 12 anyos ang edad sa criminal liability alang sa bangis nga mga krimen (ang mga bata nga makapatay o makapanlugos tanggungon na sa youth centers nga kinahanglang tukuron sa local government units); ug
Gigahinan na og kuwarta ang pagtukod og Comprehensive Juvenile Justice and Welfare System ubos sa Department of Social Welfare and Development (DSWD).
* * *
Dili na mabasol sila si Pangilinan ug ubang mga magbabalaod sa kapakyas sa Malakanyang pagpatuman sa ilang napasar nga mga balaod:
Si kanhi Presidente Gloria Macapagal Arroyo ang angay’ng tulisukon sa kapakyas sa hingpit nga pagpatuman sa balaod niadtong 2006; ug
Si kanhi Presidente Noynoy Aquino ang angay’ng paninglan sa utro sab nga kapakyas pagpatuman sa inusab ug mas komprehensibo na unta nga balaod niadtong 2013.
* * *
Kon ipa-utingkay ni Presidente Duterte kinsa ang nidason sa orihinal nga balaudnon ni Pangilinan niadtong 2006, nga mao g’yud ang iyang gikalagotan pag-ayo, makugang siya nga naapil sa listahan sa mga senador ang labing suod niyang mga alyado: Joker Arroyo, Rodolfo Biazon, Pia Cayetano, Miriam Defensor Santiago, Franklin Drilon, Loi Ejercito, Jinggoy Estrada, Juan Ponce Enrile, Juan Flavier, Dick Gordon, Ping Lacson, Lito Lapid, Jamby Madrigal, Jun Magsaysay, Serge Osmeña, Nene Pimentel, Ralph Recto, Bong Revilla, Mar Roxas ug Manny Villar.
Kon wa pa makabantay si Duterte, wa’y senador nga nisupak sa balaod nga gitumong pagluwas sa mga bata gikan sa mga prisohan sa banggiitan nga mga kriminal. [email protected].
- Latest
