EDITORYAL - Palpak sa LTFRB

Ang kadagkoan sa Land Transportation Franchising and Regulatory Board (LTFRB) dinhi sa Central Visayas mipasiatab nga wala na g’yud sila mangisyu og bag-ong prangkisa ngadto sa mga transport operators. Apan kahibudngan kaayo nga taliwala sa ilang mga pangangkon, dunay mga transport operators nga padayong nagpadaghan og units.

Makita usab sa rekord sa Land Transportation Office (LTO) nga kaniadtong miaging tuig adunay 14,432 ka bag-ong girehistro nga mga utility vehicles, nga naglakip sa mga taxi ug passenger jeepneys, nga nadugang kini sa karaang 128,649 nga gidaghanon sa mga utility vehicles nga rehistrado na ug nabag-ohan lang sa ilang mga rehistro.

Pagka karon, miabot na og 726,028 ang tanang sakyanan nga narehistro dinhi sa Central Visayas (Cebu, Bohol, Negros Oriental ug Siquijor) ug dili ikalimod nga daghang public utility vehicles, sama sa PUJ’s ug taxi, nga giisyuhan sa LTFRB og mga Certificate of Public Convenience (CPC) nga nagtugot sa maong mga sakyanan pagpamasahero bisan og wala’y igo nga grahe ang mga tag-iya alang sa ilang sakyanan.

Tungod sa gihimo sa LTFRB nga nangisyu og CPC sa mga public utility vehicles nga wala g’yud nila sutaa kon ang mga tag-iya may igo ba nga gidak-on nga grahe alang sa ilang mga sakyanan, miresulta nga daghang taxi ug PUJ anaa ra sa karsada giparada human sa ilang biyahe.

Karon, paspas ang kampanya sa mga traffic enforcer dinhi sa dakbayan sa Sugbo batok sa mga sakyanan nga anha ra sa karsada iparking sa gabii ngadto na sa buntag. May mga tag-iya og taxi ug PUJ nga mitiyabaw, apan wala nila huna-hunaa nga sila maoy wala motuman sa balaod.

Ang mga tag-iya sa public utility vehicles, apil ang truck ug bus, misumiter og sketch sa LTFRB, sa ilang mga grahe sa sakyanan ug tungod niini, giisyuhan sila sa LTFRB og CPC nga wala na mosusi kon tinuod ba ang pangangkon sa mao nga mga aplikante.