Angay i-holiday sa Huwebes

Angayan lang nga ideklarar sa Malacañang nga holiday karong Huwebes, petsa 26 sa Oktubre, ang adlaw sa paglubong ni Archbishop Emeritus Ricardo Cardinal Vidal. Gawas sa iyang pagkabalaan nga tawo, si Cardinal Vidal mihatag sa tibuok niyang kinabuhi isip arsobispo isip halad ngadto sa mga tawo sa Artsidyosesis sa Sugbo.

Makadaghang higayon nga mitabang si Vidal sa pagpakalma sa mga manag-away nga personalidad, pag-abot sa managlalis ug magkaatbang nga opisyal ug grupo, ug dako og natampo alang sa Sugbo.

Atol sa EDSA People Power niadtong 1986, si Cardinal Vidal sekretong misulod sa Malacañang aron estoryahon ang diktador nga si Ferdinand Marcos nga panahon na nga mobiya siya sa Pilipinas aron sa paglikay sa kagubot.

Ang pari nga akong na-estorya mahitungod niini nagkanayon nga kadtong iyang pagkumbinser ni Marcos pagbiya sa Pilipinas usa ka “untold story” kalabot sa Cardinal. Kadto nanghitabo samtang ang laing Cardinal niadtong higayona, si Arsobispo Jaime Cardinal Sin, kauban ang mga Pilipino, nagmartsa sa Edsa.

Niadtong miaging Huwebes, si Presidential Assistant for the Visayas Mike Dino miduaw sa haya ni Cardinal Vidal didto sa Cebu Metropolitan Cathedral human sa iyang pakigtagbo kang Cebu Archbishop Jose Palma sa komedor sa Cathedral, samtang si Palma kauban sa kura paruko sa Cathedral nga si Msgr. Ruben Labajo, Msgr. Achilles Dakay, ug laing pari.

Pagkanaog ni Dino, giubanan siya ni Palma pagsud-ong sa haya ni Cardinal Vidal. Apan pagkahuman, si Dino gisugat sa mga sakop sa media ug didto gipangutana kon mahimo ba nga ipadeklarar nga holiday ang adlaw sa paglubong ni Cardinal Vidal karong Huwebes.

Pagkasunod adlaw (adlaw’ng Biyernes), gipadad-an ni Dino og komunikasyon si Presidente Duterte, pinaagi ni Executive Secretary Bingbong Medialdea aron irekomendar ang gipangayo sa mga tawo nga ideklarar nga holiday karong Huwebes.

Apan gibilin ni Dino ang desisyon sa buhatan ni Medialdea. Apan nagtuo ko nga wala’y wala makaila kang Cardinal Vidal. Nagtuo ko nga mismo sila si Duterte, Medialdea, Bong Go, Jun Evasco ug tanang tawo diha sa Malacañang nakaila kang Cardinal Vidal. Mismo ang mga kanhi presidente, bise presidente, mga senador, kongresista, ug mga sakop sa Korte Suprema nakaila kaniya. Gani, si Senador Tito Sotto, ug laing mga senador, miduaw gayud sa haya ni Cardinal Vidal niadtong Biyernes.

Nasayod sila sa kontribusyon ni Cardinal Vidal sa Pilipinas. Gani, sibo usab nga i-half mast ang mga bandera sa Pilipinas aron ipadayag ang kasubo sa tibuok Sugbo tungod sa pagtaliwan sa giilang importanteng tawo. Mitaliwan na si Cardinal Vidal, apan ang iyang mga hiyas ug pagtulon-an magpabilin sa galamhan sa mga Sugboanon hangtud sa hangtud.