Sakpan lagi mo no?

May usa ka lumolupyo sa Sitio Avocado sa Barangay Lahug nga mitug-an kanako nga adunay tanod sa ilang barangay nga adto kaniya mag-remit ang mga usher sa illegal swertres.

Base sa report nga akong nadawat, “P” ang letra nga sinugdanan sa angga niining mao nga tanod, ug ang usa sa mga usher nga mag-remit kaniya mao si Fanie. Maayo tingali nga imbestigahon kini sa kapitan sa Lahug.

Kuyaw kaayo kon masuko ang mayor ninyo, putlan na sab mo sa City Hall honorarium, apektado mo dihang tanan. Kamo nga mga tanod nga nagtinarong, hala, tug-ani ko ninyo.

Pastilan, sa Barangay Guadalupe sab, nakadawat ko og report nga ang tanod gihapon maoy mangolekta sa halin sa mga usher sa illegal swertres. Hangtud karon, wa pa’y aksiyon ang kapitan nga si Michael Gacasan.

Grabeha no? Kon tuohan nimo ang report gikan sa publiko, duna na’y mga tanod ug opisyal sa barangay nga nalambigit sa operasyon sa illegal swertres? Diha sa Barangay Suba ug Pasil, dunay mga opisyal nga giingong nalambigit.

Gihatag na nako ang mga ngalan niini ngadto kang Cebu City Police Office (CCPO) Director Joel Doria ug gipahimoan na og pakisusi. Ambot kon dili ba kaha motak-om ang baba sa mga gisugo ni Col. Doria.

Sa Barangay Quiot, ang illegal swertres giingon nga anaa mag-operate sa likud sa Japer School ug sa Upper Yati, anaa ra daplin sa karsada. Uy, ngano nga wala man kini matagad ni Konsehal Gerry Auxilio?

Diha sa Sitio Englis sa Guadalupe, ang giingong “overall coordinator” sa illegal swertres mao ang usa ka Tingtang. Palihug kuno mga polis sa Guadalupe, aksyoni ninyo kining report nga akong nadawat.

May gitug-an ang akong informer og usa kuno ka opisyal sa Barangay Guadalupe. Adto ko kini ihatag ni Col. Doria. Unya, bahin sa mga video karera ug moli-moli diha sa Barangay Tejero, ilabi na likud nga bahin sa karaang provincial jail ug diha sa kilid sa Liberty Lumber ug sa may Blessed Sacrament, mora og wala pa maaksiyoni sa Waterfront Police.

Laing report nga akong nadawat nagkanayon nga daghang video karera ug moli-moli sa Barangay Pahina San Nicolas ug “LT” ang logo. Unya, ang swertres kuno sa ilang dapit, ang financier paryente ra sa usa ka opisyal sa barangay.

Daghan kaayo nga inpormasyon ang akong madawat gikan sa publiko. Ingon unta niini ang himoon sa kapolisan, unya aksiyonan dayon nila. Ang inyong report para sa kapolisan ipadala sa 0943-0766611.