Drayber nga bastos

Duna g’yuy mga drayber nga bastos kaayo. Nakasaksi ko og mga sakyanan nga diriyot magkabangga sa gawas nga bahin sa Marco Polo Plaza Hotel kaniadtong Biyernes sa gabii.

Ang gisundan nako nga sakyanan nagtungas sa Veterans Drive samtang nagdanga-danga kini sa tungod sa gate sa hotel, mihimo kini og light signal pinaagi sa “high and low” sa iyang headlight kay adunay puti nga SUV nga migawas gikan sa hotel gate.

Bisan og nag-light signal ang sakyanan nga akong gisundan, mipadayon g’yud kadtong puti nga SUV gikan sa hotel nga motabok unta sa karsada samtang ang gisundan nako nga sakyanan, wala usab momenor samtang nagdagan patungas.

Resulta, direyot sila magkabangga. Maayo gani kay wala mopadayon sa pagtabok kadtong puti nga SUV. Sa akong tan-aw niadtong mao nga sitwasyon, sad-an kadtong puti nga SUV. Klaro kaayo nga ang drayber sa maong SUV walay “road courtesy.”

Sa mga ingon niadto nga sitwasyon, kinahanglang mohatag g’yud og kortesiya ang mga drayber nga gikan sa gate sa hotel sa mga sakyanan nga nagtungas, ilabi na nga naghatag kini og “light signal.”

Kon motabok ang SUV pagpugos, mahunong ang sakyanan nga akong gisunod ug sakripisyo na kaayo ang pag-abante pagbalik, ilabi na nga tungason ang mao nga karsada.

Ikaduha, ang mga drayber sa sakyanan nga buot motabok sa karsada maoy mo-give way sa mga sakyanan ug maghuwat og higayon nga luwas na siya nga motabok. Unta, kining akong lindog karon makahatag og giya sa mga drayber nga kuwang pa og kasinatian.

* * *

Tungod sa promotion sa mga car dealers nga sayon na lang kaayo ang pag-angkon og mga sakyanan pinaagi sa barato nga down payment ug monthly installment, daghan kaayo nga mga drayber nga nagmaneho og sakyanan nga kuwang pa og kinaadman sa proper driving.

Sagad niini mao ang mga nagmaneho og gagmay nga mga sakyanan. Mahimong mangasuko niini kadtong mga maig-an, apan igo ra ko nga nagtug-an sa tinuod, base sa akong naobserbahan.

Kon hinay gani ang pagpadagan nimo sa sakyanan, ayaw g’yud pagpatunga. Makalagot kaayo nga tan-awon nga ang usa ka sakyanan anaa sa tunga magsubay, unya ang iyang gisunod tua na sa layo.

Resulta, ang nagsunod niini, mapugos na lang sa pag-overtake agi sa iyang tuo nga bahin, nga sayop g’yud unta. Ang tanang drayber nag-agi g’yud sa pagsugod, apan magtuon g’yud unta mo, aron dili kamo makasakripisyo sa uban.