Tagulilong nga ripple
May kasayuran nga gibandilyo si Presidente Rodrigo Duterte sa iyang mga diskurso nga lisud tuohan sa katawhan.
Apan kanunay sila nga gipasaligan sa iyang mga tigpamaba nga ang presidente nakakuha sa labing tinagoan nga kasayuran gikan sa nagkalainlain nga mga ahensiya sa sulod ug sa gawas sa nasud.
May kasayuran siya nga ipaagi lang og mga pasumbingay nga wa’y detalye. Gibalikbalik niya pagpahibawo nga dul-an na sa usa ka gatos ka opisyal ang iyang gitaktak tungod sa pangurakot.
Pipila ra ang nanganlan. Wa’y nakaseguro kon husto ba o gipaburot lang ang iyang pangangkon.
* * *
Sa iyang pakig-atubang sa kahugpongan sa Overseas Filipino Workers (OFWs) sa niaging semana, yano nga gipahibawo sa presidente nga may gitaktak na sab siya nga opisyal. Apan dili niya nganlan tungod sa kabalaka nga mauwawan ang pamilya.
Sa wa pa mahinayak ang pagduda nga hinimu-himo lang og estorya, mga tinubdan sa Malakanyang nidason nga gitaktak g’yud niya ang luyuluyong kalihim sa Department of Budget and Management (DBM).
Apan dili kahinganlan kay iyang tinudlo ug suod nga kauban sa law office sa iyang labing sinaligan nga si Executive Secretary Salvador Medialdea.
* * *
May kasayuran si Presidente Duterte karong bag-o nga wa’y ganahan nga mohatag og detalye: Ang iyang pangangkon nga riple gikan sa China ang nakaigo ug nakapatay sa bangis nga mga lider sa Maute Group sa Marawi nga sila si Isnilon Hapilon ug Omar Maute.
Si Defense Secretary Delfin Lorenzana, inay nga modason sa pangangkon sa presidente, nipasalamat sa Estados Unidos tungod sa pagpagamit sa ilang drones, spy planes ug ubang kahimanan sa pagpaniid ug abundang kasayuran sa ISIS sa Middle East.
* * *
Mas abunda ang detalye sa 8th Scout Ranger Company sa Philippine Army sa pagkamatay nila ni Hapilon ug Maute niadtong Lunes sa kadlawon:
Sunudsunod nga naigo sila si Hapilon (sa dughan) ug Maute (sa ulo) dihang nanggawas sa gitagoan nga building aron pag-ikyas paingon sa Lake Lanao; ug
Ang nakaigo sa duha ang remote-controlled nga 50-caliber belt-fed machine guns ibabaw sa armoured personnel carriers (APCs) sa 1st Cavalry Squadron nga may thermal camera mao nga bisan ngitngit, nakakita ang mga sundawo sa mga terorista ug mga bihag.
Kon wa pa ka makabantay, wa nila’y naghisgot og riple sa China.
* * *
- Latest
