Aron sayon nga makahinumdom (2)

* Inutok nga kalingawan — Sama sa dama, chess, puzzles, soduko ug uban pa, makatabang ni pagbaid sa utok nga dali makamemorya. Daghang ‘apps’ sa selpon, nga ‘brain games’ nga makalingawan. Pilia lang ang gusto mo nga abilidad (skills), nga daling madebelop ang kaalisto sa pagsabot ug pagmemorya.

* Pagkat-on og bag-ong abilidad— Duna pa kita’y daghan nga kapuslan sa kinabuhi, busa magtuon ta og dugang nga bag-ong kabibalo, aron maminten nga malingaw maglihok ang atong memorya ug palig-on sa sistema sa pangutok.

* Panggaa ang gibati — Adunay katarungan nga dili malimtam ang unang gugma nga napatik sa atong memorya. Palambuon nga positibong gakson kini nga nakasilsil sa alimpatakan, diha sa hunahuna, sayon ra kita makamemorya. Wala’y butang nga lisud, basta gugma na maoy atong inspirasyon.

* Ang pamalandong— ang pagpalugdang sa kaugalingon pinaagi sa pamalandong, sayon ra mamemorya ang mga linugdang, sa angay nga buhaton. Makatabang sab ni sa paglig-on nga sayon ra kita nga makahinumdom. Paghimo’g mga daklit nga paghinuktok ug ikalma ang hunahuna, paagi ni nga paus-os sa stress ug molig-on ang memorya. Sa 1 ka pagtuon, nadiskubre nga ang 20 minutos, 4 ka beses sa usa ka adlaw nga pamalandong, 50% napalig-on ang trabaho sa utok, sama sa paghunahuna, pagsabot ug pagmemorya.

* Isulat ang buhaton —  magdepende ni sa palabihon nimong estilo sa pagkat-on, ang pagsulat kon unsa ang imong nasabtan, sayon ka ra makahinumdom ug makamemorya. Tungod kay usa kini sa sentido nga mopaandar sa kalihokan sa utok, aron ipaabot ang mga mensaheng ipatik sa memorya.

Matud pa, kon unsa kadaghan ang imong nasulat, mao sa’y gidaghanon sa mga butang nga narehistro sa imong panumdoman.