Karera ug moli-moli gibalik na sab

Pahibaw-on nako ang mga polis nga nadestino sa Waterfront Police Station ubos ni Chief Inspector Jovito Labra nga miari na usab nako kagahapon ang akong informer sa Barangay Tejero ug mitug-an nga namalik na usab ang mga video karera ug moli-moli sa ilang lugar.

Aw, abtik man hinoon kaayo kining mga polis nga nadestino sa Waterfront Police Station nga moaksiyon sa atong mga report, apan ang mas nindot g’yud unta mao nga mosuroy sila kanunay sa ilang teritoryo aron masayod sila og unsa na ang sitwasyon.

Kinahanglan sab nga duna mo’y informer nga mopahibalo ninyo kabahin sa mga ilegal nga kalihukan sa inyong teritoryo. Dili man ko motoo nga wala mo’y informers, mao nga nagduda ko nga nasayod na kamo niini apan inyo lang nga gipasagdan.

Kini sab nga mga opisyal sa Barangay Tejero maghilum-hilom lang nga tingali kakunsabo sa mga operator niining mao nga mga gambling machines nga anaa diha likud sa karaang provincial jail, ug diha sa dapit sa Liberty Hardware ug sa may Blessed Sacrament.

Tan-awa ra gud sa Barangay Ermita nga abtik kaayo si Kapitan Imok Rupinta, kanunay’ng sakmiton nila ang mga video karera ug molimoli nga gibutang sa ilang barangay.

Kon kaniadto, hinay ang mga opisyal ug tanod sa Ermita sa pagsumpo sa illegal gambling machines ug drugas sa ilang dapit, karon lahi na si Imok. Mo-report pa dayon nako sa iyang accomplishment.

* * *

Maayo kay anam-anam na nga nakatultol ang mga motorista sa bag-ong opisina sa Land Transportation Office (LTO) sa Mandaue City nga anaa sa JCenter Mall sa Barangay Bakilid.

Nakasakay ko og PUJ nga biyahe og Mandaue kagahapon, mitug-an kanako ang drayber nga nakagusto sila sa mao nga lugar kay walay abog, dili init, ug dili ka maulanan kon mag-uwan. Dili pareho didto sa karaang LTO sa Barangay Looc, Mandaue nga init ug abog.