Salamat Cardinal
Maisip gayud nato nga usa sa labing banggiitan nga Sugboanon ang bag-o lamang nga mipanaw nga si Cebu Archbishop Emeritus Ricardo Cardinal Vidal. Kini bisan pa man kon wala gayud siya matawo ug nagtubo dinhi sa Sugbo.
Isip halangdong lider sa simbahang Katoliko dinhi sa Sugbo ug sa nasud, hilabihan ka dako sa tulomanon nga iyang gihuptan. Apan pabilin siya nga mapahiubsanon ug nakatungtong sa yuta bisan pa sa kadako sa iyang inpluwensiya.
Dinhi sa Sugbo, wala na siguro’y makalumpag pa sa dako nga kabilin ni Cardinal Vidal ngadto sa mga Sugboanon dili lamang sa aspeto sa relihiyon. Ato siya nga gihangad tungod usab sa maayo ug sulondon niya’ng gawi.
Tungod lagi sa iyang paghangop sa kanaiyang Sugboanon, dili na siya layo sa atong dughan. Mao na nga maisip gayud nato nga usa siya sa mga Sugboanon. Kini tungod usab sa hilabihan ka daghang kasingkasing nga iyang nahikap dinhi.
Dili ikalalis nga tungod sa iyang dako nga impluwensiya ug pagdumala misulbong ang simbahan Katoliko dinhi sa Sugbo. Ug tungod usab sa dako nga ehemplo nga gipakita sa cardinal, dili tiaw nga linibo usab ang nagsunod kaniya.
Dili ako sakop sa mao nga tinuohan apan ako’ng nakita ang iyang pagkamaayo nga mogiya sa panon sa mga Katoliko. Hinuon ang iyang inpluwensiya dili lamang migamot dinhi sa Sugbo, kondili, lakip na sa tibuok nasud, ilabi na sa politikal nga aspeto.
Dako nato nga kasub-anan kini’ng pagpanaw sa halangdon nga cardinal, ug nga igo na lamang kita sa pagpasalamat sa iyang dako nga nabuhat dinhi sa Sugbo, dili lamang sa espiritohanon nga kabag-ohan apan lakip na sa daghan sa ato’ng inadlaw nga panginabuhi.
Dili hilabwan ang abilidad ug karisma ni Vidal sa iyang pagdumala sa simbahang Katoliko dinhi, ug mokabat pa siguro og taas nga panahon ayha pa ang Sugbo makabaton og susama kaniya .
- Latest