Duha ka sugilanon ni Vidal
Bag-o pa nga reporter si Ferdinand Mañus sa DYAB Radyo Patrol dihang gisugo siya ni news director June Perez sa pag-interview ni Ricardo Kardinal Vidal. Wa magdahom si Ferdinand nga sa iyang kalinghod hatagan siya og higayon sa prinsipe sa Simbahang Katoliko.
Mao nga labihan niyang kuganga dihang giatubang siya ni Kardinal Vidal nga nakalímtan niya unsa ang ipangutana. Bugtong niya nga nasulti nga lay minister ang iyang amahan. Inay masuko nga nausik ang iyang panahon, nagpahiyom si Kardinal Vidal nga nangutana niya kon dili ba siya ganahan nga moalagad sab sa simbahan.
* * *
Sunod nilang kita ni Kardinal Vidal, may igo na nga kasinatian si Ferdinand, nga gawas nga wa na makalimti unsa ang ipangutana, nakaandam pa g’yud og mas daghang pangutana kon mohatag og dugang higayon ang kardinal.
Apan wa siya kaandam sa timbaya ni Kardinal Vidal niya: “Kumusta man ang imong Papa? Ikaw, lay minister na?” Wa kalimot ang kardinal niya ug sa bokasyon sa iyang amahan. Nakasinati si Ferdinand sa determinado ug wa’y kinutoban nga mga paningkamot ni Kardinal Vidal sa pagdani og dugang mga alagad sa simbahan.
* * *
Inila nga pari niasoy sa iyang wali nga human sa ilang ordinasyon, labihan nilang lipaya dihang gipakuyog sa pagduaw ni Kardinal Vidal sa lagyo nga mga parokya. Gihangop nila ang kahigayonan nga makabati sa makinaadmanon nga mga tambag sa kardinal, siyaro kon dili mokagiw sa tanan nila nga kalibog.
Nahugno hinuon sila kay si Kardinal Vidal ang nangunay pagka mananabtan sa Santos nga Rosaryo. Mao nga wa sila’y laing nahimo gawas sa pagsabat hangtod nga nangabot sa ilang destinasyon.
* * *
Sa sunod nilang biyahe, labihang layoa sa ilang gipadulngan nga nahuman na ang Rosaryo nga gipangulohan sa kardinal sa tunga-tunga pa lang sa ruta. Nagsinikhanay sila sa kalipay kay sa kataposan, makapangutana na g’yud sila sa haligi sa simbahan.
Malayo pa ba?,” gisukna sa kardinal ang ilang drayber, nga nitubag nga kapin pa sa oras ang ilang destinasyon. Sa wa pa sila makasugod og pabuhagay sa dugay na nga giluom nga mga kalibog, nilingi si Kardinal Vidal nila, nipasundayag sa tam-is niya nga pahiyom ug, sa labing lumo niya nga tingog, nisugod og bag-ong Rosaryo.
- Latest
