The saintly man

Ingon niini ang akong pagtan-aw ni Cebu Archbishop Emeritus Ricardo  Cardinal Vidal kinsa hulagway sa usa ka balaan nga imahen. Kada tan-aw nako sa iyang panagway sa higayon nga magkatagbo kami kaniadto, makaingon ako nga mura man ni og santos tawhana.

Hinay ug mapaubsanon kaayo manulti ug dili g’yud mobalibad kon duolon, dili lang tungod kay magpa-interview, kon dili, gusto niya nga mag-estorya nga usa ka suod nga higala o nakig-estorya siya sa iyang anak.

Ini’g lakaw na nako human sa interview, mohatod pa siya sa pultahan ug moingon “I will always pray for you.” Para nako daw ibayaw ako sa langit nga makadungog nga usa ka talahurong lider sa simbahan personal molitok niini nga pulong.

Wala na’y mohunghong kanako nga “I will pray for you” tungod kay mitaliwan na man siya sa kalibutan apan segurado ako nga personal na niya kining ihunghong ngadto sa Ginoo kay atua na man siya sa langit.

Pagka swerte nako, natong tanan, nga atong nahimamat si Cardinal Vidal tungod kay salamin siya sa kaaghop nga naghatag og inspirasyon sa katawhan taliwala sa mga dagkong isyu karon sa katilingban.

Si Cardinal Vidal lang ang bugtong tawo nga ma-starstruck ko tungod sa akong pag-idolo kaniya. Gani, kada magkita mi, mohangyo g’yud ko nga mag-selfie.

Kataposan namong kita, atol sa iyang ika-61 nga sacerdotal anniversary niadtong March 17 ning tuiga diin gipapirmahan nako ang hulagway namong duha ug ako pa nga gipangayo ang ballpen nga iyang gigamit sa pagpirma nga akong gihiposan hangtud karon.

Mao na diay kadto ang katapusan namo nga panag-estorya ug katapusan niyang paghunghong nako “I will always pray for you”.

Daghan salamat Cardi, I love you, my soon to be saint Ricardo Cardinal Vidal, until we meet again.