EDITORYAL - Plastic ban
Maayo kaayo nga sa katapusan nakahunahuna na g’yud si Cebu City Mayor Tomas Osmeña nga mopatuman og total ban sa mga plastic bag dinhi sa siyudad tungod sa kaseryuso na niining problema sa pagbaha sa dakbayan kay mao kini hinungdan sa pagbara sa agianan sa tubig. Adunay ordinansa ang siyudad nga nagdili paggamit og plastic bags sa mga tindahan pangputos sa mga gipamalit sa mga tawo, apan kada adlaw lang nga Sabado. Adunay mga tindahan nga naghimo og ilang inisyatiba nga gidugangan nila ang adlaw nga dili mogamit og plastic.
Nagtinguha karon si Konsehal Raymond Garcia nga usbon ang ordinansa ug ang plastic bag ban ipatuman upat ka adlaw sa usa ka semana aron mamenosan g’yud ang plastic bags. Apan mas gusto si Mayor Osmeña nga total ban na g’yud sa mga plastic bag maoy buhaton kay gawas nga wala na’y kalibog sa mga tagdumala og balay patigayon kon kanus-a ang adlaw nga gidili ang plastic bags, makapamenos g’yud kini sa mga basurang plastic.
Maayong saludohan ang mga opisyal sa siyudad kon kini ila g’yud nga buhaton. Apan kining basura nga plastic gamay ra nga pahat sa kinatibuk-ang problema sa pagbaha dinhi sa siyudad. Naa pa’y ubang basura nga gipataka lang og tambak, wala mabahig nga basura, dili regular nga koleksiyon sa basura, daghang kuwang nga inprastraktura, kakuwang sa enforcement sa mga environmental laws ug mga ordinansa sa siyudad, ug uban pa.
Kining tanan nakatampo sa problema, ug dili g’yud masulbad ang pagbaha kon ang plastic ban ra maoy himoon, kay gihimo na kini sa siyudad sa Mandaue apan hangtud karon may manglutaw gihapon nga basura sa mga gagmay’ng kanal sa maong siyudad hinungdan nga molunop gihapon sa mga lugar nga kaniadto maoy sagad bahaon. Dako kaayo og papel ang mga opisyal lokal, ilabi na ang barangay level, sa pagsulbad sa baha. Hinuon kining pag-ban sa plastic usa kini ka dakong kalamboan nga angay dayegon kon mahinayon.
- Latest