Goodbye Cardinal
Akong pagyukbo ngadto ni kanhi Cebu Archbishop Ricardo Cardinal J. Vidal nga mitaliwan na kagahapon. Buotan g’yud kaayo siya nga pagka alagad sa simbahan kay sukad nga nahimo siyang pari kaniadtong 1956, wala g’yud kita makadungog nga nalambigit siya og mga binuang.
Lahi ra kaayo si Vidal sa ubang mga pari nga dunay uban nga nakasohan kay giilisan ang mga bulawan nga estatuwa sa mga santos, nagpadato sa ilang kaugalingon ug miabuso sa mga menor de-edad nga ilang gipatrabaho sa gidumala nila nga simbahan. Para kanako, ang mga tunob ni Vidal angay gayud nga sundon sa kaparian aron nga makaangkon sila og respeto sa katawhan.
* * *
Dayegon nako si Ermita Barangay Captain Imok Rupinta kay miaktibo na siya sa paghimo’g kampanya batok sa ilegal nga sugal ug ilegal nga drugas sa iyang barangay.
Gitawag ko niya kagahapon kay nagpahibalo siya nga may nasakmit siya nga duha ka gambling machines didto sa Sitio Bato, nga sakop sa iyang barangay.
Wala na kuno’y mga illegal gambling machines sa Sitio Ermita Proper, kanang lugar nga duol sa barangay hall. Akong awhagon ang mga mabuot nga lumolupyo sa Ermita nga pahibaw-on ko nila kon duna pa’y nag-operate nga gambling machines sa ilang lugar.
Daghan ko og nadawat nga mga report pinaagi sa akong hotline nga 0943-0766611, nga ang mga report, diha-diha usab nga mapunta ngadto sa opisina ni Cebu City Police Director Joel Doria.
* * *
Wala g’yuy kibo ang mga opisyal sa Guadalupe kabahin sa report nga adunay ilang tanod nga tigkolekta sa halin sa illegal swertres. Lihoka g’yud kini Kapitan Michael Gacasan kay may nagduda ra ba nimo nga gitugotan nimo ang mga tanod nga maoy tigpangolekta sa halin gikan sa mga coordinators.
Maayo unta og dili tinuod ang nadawat nako nga report. Dili g’yud maayo ang mao nga report kay tiaw mo, opisyal sa barangay nalambigit sa operasyon sa illegal swertres?
* * *
Mga 10 na diay ka clamp sa dakbayan ang gipangguba sa mga tag-iya sa sakyanan nga gitauran niini. Gi-clamp ang mga sakyanan kay nasakpan kini nga giparking sa daplin sa karsada.
Akong awhagon ang CITOM nga himoi ninyo og lakang legal ang mga tag-iya sa sakyanan. Kinahanglan nga bayran nila ang kantidad sa clamp nga ilang giguba.
Kon dili ninyo gukdon ang mao nga mga motorista, mag-anad sila ug mosundog ang uban.
- Latest
