Pagbisto sa plano
Si House Speaker Pantaleon Alvarez, ang ikaupat nga labing taas nga opisyal sa nasud ug maoy gipasidunggan ni Presidente Rodrigo Duterte nga maoy usa sa nakapakumbinser niya sa pagdagan pagka presidente sa piniliay sa niaging tuig, naneguro na nga ideklarar g’yud nila ang revolutionary government.
Atol sa iyang pakighinabi sa Arangkada sa DYAB Abante Pa, Bisaya!, gitataw ni Alvarez nga abunda ang ilang sukaranan sa pagtukod og bag-ong gobiyerno human sa pagpapas sa Kongreso, mga hukmanan ug ubang mga institusyon ug karon na ang tukma nga panahon sa paghimo niini.
* * *
Gitumbok ni Alvarez ang mosunod nga mga sukaranan sa pagpabarug ni Presidente Duterte og revolutionary government:
Una, mao sab ni ang gihimo ni anhing Presidente Cory Aquino sa pagbanos niya sa Malakanyang kaniadtong 1986 sa wa pa maumol ang 1987 Constitution;
Ikaduha, nisaad si Presidente Duterte sa niaging kampanya nga kon babagan ang iyang gisaad nga kausaban mapugos siya sa pagdeklarar og revolutionary government ug ang iyang pagdaog nagkahulogan nga gidasonan siya sa katawhan; ug
Ikatulo, ang mga mananaog maoy moumol sa mga balaod ug maoy magbuot unsa’y kausaban nga ipatuman ug ang mga nangapilde angay nga mosunod.
* * *
Nipasangil si Alvarez nga wa’y mahitabo kon igo lang sila nga magpaabot kanus-a lihokon sa mga senador ang 110 ka balaudnon nga napasar sa mga kongresista pagpatuman sa kausaban nga gisaad ni Presidente Duterte, apil na ang pag-usab sa konstitusyon ug sa sistema sa gobiyerno.
Matud ni Alvarez, dili na makapaabot si Presidente Duterte sa tungatunga sa iyang termino, kanus-a wa na’y motuo niya, kay ang mga politiko malinga na sa pagpangandam sa sunod nga piniliay’ng presidensiyal sa 2022.
* * *
Nipasabot si Alvarez nga ang revolutionary government maoy labing laktud nga paagi sa paghimo sa gobiyerno nga iya sa katawhan ug dili sa pipila lang ka adunahan. Nipasalig siya nga ang federalismo maoy sulbad sa hulga sa terorismo sa Mindanao.
Niangkon siya nga kinahanglang magdiktador si Presidente Duterte, apan dili angay’ng kahadlokan sama sa diktadura ni anhing Ferdinand Marcos, kon dili, angay’ng hangpon kay sama kini sa diktadura ni Lee Kuan Yew sa Singapore.
Ang nakapait mao nga gibalikbalik ni Duterte nga ang iyang idolo mao si Marcos, dili si Lee.
* * *
- Latest
