EDITORIAL - Pagyukbo kang Cardinal Vidal

Subo kaayo karon ang mga Katoliko tungod sa pagtaliwan na sa kanhi arsobispo sa Sugbo nga si Ricardo Cardinal J. Vidal, nga giyukboan sa mga nakaila kaniya tungod sa iyang pagka buotan nga alagad sa simbahan. Lumad nga taga Marinduque si Vidal ug nadestino lang dinhi sa Sugbo kaniadtong 1981 human siya itudlo ni Pope John Paul II isip Coadjutor Archbishop, ug nahimong arsobispo kaniadtong Agosto 24, 1982 diha nga namatay si Julio Cardinal Rosales.

Wala’y makalalis nga giisip na usab ni Vidal nga siya Sugboanon kay bisan gani og miretiro na siya pagka arsobispo sa Sugbo kaniadtong Enero 13, 2011, gipili man niya nga magpabilin ug dinhi magpakamatay. Mahimo man unta nga human sa iyang pagretiro sa katungdanan, mopauli na siya didto sa dapit nga iyang natawhan nga mao ang lungsod sa Mogpog, Marinduque. Apan gipili ni Vidal nga magpabilin siya sa Sugbo ug nagpadayon sa pag-abag sa mga kalihukan sa simbahan.

Ang mga tunob ni Vidal isip usa ka buotang alagad sa simbahan, magsilbe unta nga sumbanan sa kaparian ug maoy ilang subayon aron sila respetohan sa katawhan, ug likayan nga sila malambigit og mga makauuwaw nga kalihukan. Wala malilong nga daghan kaayong mga sakop sa laing reliheyon nga mangagni sa mga Katoliko nga mobalhin sa ilang pundok.

Ang kalihukan sa ubang kaparian nga malambigit og mga anomaloso nga kalihukan, ilabi na ang pag-abuso sa kuwarta sa simbahan ug ang pag-abuso sa mga menor de-edad nilang sakop, makahatag og mansa ug may kahigayon nga makapamenos sa pagtuo sa ubang mga Katoliko.

Tukma kaayo nga si Vidal gihimong “Adopted son sa Sugbo” kaniadto pinaagi sa usa ka ordinansa sa dakbayan. Sukad nga si Vidal nahimong pari kaniadtong 1956, wala gayud siya malambigit og mga tinonto nga makahatag og kauwawan sa simbahan.  Goodbye Cardinal Vidal.