Piangan ang presidente

Ang pagtibugsok sa popularity rating sa usa ka presidente normal lang sa matag karon ug unya. Bunga kini sa daghang mga isyu nga giatubang sa iyang administrasyon, dala na niana ang paninguhang “destabilization” sa oposisyon nga gusto na dayong mopuli sa gahum.

Sa dihang migawas ang survey result sa Social Weather Station, nakita nga migamay ang popularity ug trust rating ni Presidente Rodrigo Duterte sa Luzon ug Kabisay-an.

Masabtan nato ang Luzon kay anaa nianang lugara naglublob ang mga dagkong politiko, ilabi na ang Liberal Party nga wala’y puas ang pagsige og guroy ni Duterte sa mga isyu – P6.4 bilyones nga shabu shipment sa Bureau of Customs nga giduhig ni Senador Antonio Trillanes IV sa anak nga si Bise Mayor Polong Duterte, P1 bilyon nga bank account sa presidente, extra-judicial killing, ug uban pa.

Dinhi sa Kabisay-an, ang rating ni Duterte anaa natagak sa economic class “D” ug “E” apan +1 point lang ang pagkatagak, gawas nga milabang lang gikan sa “very good” ngadto sa “good.” Ang rating sa presidente sa class A, B, C, “very good” kaayo. Ug wala kini mausab.

Apan akong gikahibudngan nganong si Mayor Tomas Osmeña mipugos g’yud sa pagpasangil nga ang hinungdan sa pagkaubos sa rating ni Duterte mao si presidential assistant for the Visayas Mike Dino.

Sa wala pa ang pasangil ni Tomas, gipagawas ang balita kalabot sa reklamo sa upat ka tawo sa Tacloban nga ang pagbalhin ni Dino sa dul-an 3 mil ka pamilyang biktima sa bagyong Yolanda ngadto sa bag-o nilang mga balay sulod lang sa 18 ka adlaw, pulos lang kuno “PR” kay pagkahuman, gibiyaan lang niya.

Pero nagtuo ko nga ang maong reklamo sa Office of the President dili makalusot. Gituyo lang kadto sa mga kritiko ni Dino aron adunay magamit si Tomas pag-ingon nga si Dino ang hinungdan sa pagkatagak sa rating sa presidente.

Atong balikon, niadtong Septiyembre 21, si Senador Kiko Pangilinan sekretong nakigtagbo ni Tomas ug sa ubang mayor sa Sugbo sa usa ka kan-anan. Busa, dili ba kaha tipik sa “destabilization” kining ilang pagpunay og bira kang Dino?

Kon nahinumdom kamo sa nahitabo ni Erap Estrada, ang unang girombo sa mga interest groups ang iyang mga kalihim. Sama sa Hyatt 10, diin 10 ka kalihim mi-withdraw sa ilang support kang Gloria Arroyo.

Adunay mga grupo nga nagsige og angkon nga suportado nila si Duterte. Apan ang ilang mga lihok nagpaingon sa pagpasikat kang Leni Robredo, ug nadungan sa wala’y puas nga saway sa presidente. Kinsa nga mayor ang suod kaayo ni Leni?