Mas katuohan ang dili tinuod

Sa mga pamantalaan sama sa The Freeman ug Banat News, aduna kini inampingan nga kredibilidad, aron mas masaligan ug katuohan ang ihatag nga kasayuran. Mao nga sa kadugay na nga panahon, hangtud karon - nagkalig-on ang iyang serbisyo nga matinud-anon sa pagbalita.

Apan, aduna’y kahimanan sa komunikasyon, nga mas paspas pa, gamit ang internet, nga ginganlan og ‘sosyal media’. Gawasnon ta niini sa pagpadayag nga nag-agad lang kon unsa’y motibo, nga usahay makatuo dayon ta bisa’g dili tinuod. Mao bitaw nga daghan gihapon ang biktima sa ilad, kay dali ra kita patuohon.

Sama sa adunahan ko nga higalang biyudo, makaluluoy ang iyang kamatayon, dili tungod sa pinansyal. Ang kawala na’y pagtuo sa sirkumstansiya, maoy hinungdan, nga wala na mamauli ang mga anak nga pulos tua na nanimuyo sa abroad. Unsaon nitagam sa pagtuo nila sa dili tinuod.

Sa buhi pa kadtong ilang amahan, gusto unta nga matigum ang tanan niyang mga anak ug mga apo, kay talagsa ra man sila moduaw sa amahan. Hilabihan na ang iyang kamingaw, nihangyo siya bisan og kausa lang ka higayon, isip ‘family reunion’, apan wa’y nahimo kay lagi pulos wa’y panahon.

Nangluod kini, nga dugay na nga wala na’y komunikasyon sa iyang kahimtang, nagkahigos nga nakasakay na’s wheelchair. Gikapoy na tingali, gipahibalo ang mga anak niya, pinaagi sa ‘caretaker, nga patay na siya. Tuod man, haskang lipaya sa amahan, sulod lang sa tulo ka adlaw diha na ang tanan.

Human niadto namauli na sila nga nagbaton og dili tiaw nga leksiyon. Apan dangtan og pipila ka semana, nakadawat na sab sila’g pahibalo gikan sa abogado nila, nga patay na g’yud ang ilang amahan. Mura’g nagkasabot ang mga anak, nga maglisud na sila sa pagtuo, bisan unsa pa kini katinuod.