Mga estudyante naigo sa strike

Tinuod, wala makapiang sa dagan sa transportasyon dinhi sa Sugbo ang welga nga gipasiugdahan sa mga driver nga alyado sa grupo nga Piston, apan nakabalda kini sa pagtuon sa mga tinun-an, kansang mga klase gikanselar gumikan sa duha ka adlaw nga transport strike.

Hasol kaayo, ilabi na sa ikaduha nga adlaw, tungod kay ulahi kaayo nagpahibalo nga suspended gihapon ang klase sa second day.

Gani, kaadlawon pa nagmata na ang akong anak aron mag-andam sa iyang klase sanglit sayo man pik-apon sa school bus ug nakaabot g’yud siya sa eskwelahan.

Apan gipapauli sila sa ilang maestra dungan sa pagpangayo og “sorry” nga nahasol sila kay “late” kuno ang memo nga ilang nadawat nga nagpahibalo nga suspended ang klase.

Anugon kaayo ang duha ka adlaw nga nahikawan ang mga tinun-an sa pagkat-on sa ilang klase.

Tan-awa kon unsa kadako sa kahasol nga namugna sa gipahigayong strike sa transport sector. Dili man direkta sa karsada, kon dili, naamong intawon ang uban.

Unta sa kaulohan lang gideklarar ang wala’y klase, wala unta apila ang Sugbo, kay lahi man ta dinhi.

“Proven and tested” na man dinhi nga dili g’yud mosaler ang welga sa mga driver kay mismo ang mga sakop sa ilang kahugpongan, dili man moapil sa strike, kay pulong pa nila wala sila’y malung-ag kon magwelga.