For public use also

Ang mga taxi ug ubang public utility vehicles kinahanglang irehistro isip For Hire, kay lagi mamasahero man. Apan, karon, mahimo na diay nga mamasahero ka gamit ang imong private vehicle. Sama sa mga Habal-habal ug Angkas nga mga motorsiklo, nga ang mga rehistro niini, private vehicles, dili For Hire.

Now comes, Uber & Grab, mga private vehicles kini apan namasahero. So, mahimo ra diay nga mamasahero kon, magpasakop lang sa Uber o Grab, ako ang magbuot pila’y plite ug wala’y rota nga subayon, dili sama sa mga PUJ. Ang mahitabo, mga private vehicles for public use also. Hayahaya no? Ambot insured ba ang mga pasahero niini? Hinoon, matud pa, kining mga private vehicles nga gigamit for public use nakatabang kuno pagpaluag sa trapiko ug nakatabang nga ang mga pasahero makaabot sa ilang padulngan on time.

Ug bahin sa trapiko, didto sa Manila, adunay mga laraw nga did-an na ang solo driving, to encourage car pooling, ug usa sa mga lakang pagsulbad sa suliran sa trapiko. Ug kon ikaw ra ang sakay sa kotse, hatagan kag alternative route, dili ka paagion sa mga main thoroughfares ug mga highway.

Alang sa naghunahuna niini, usa kini ka bright idea. Hilabihan ka bright, ug lagmit ila kining himoon didto sa kaulohan. Ambot unsaon kini nila pag-implement?

Kami sa balay, lainlain ang among mga lakaw, lainlain ang oras, lisud kaayo nga magdungan mi’g gawas sa balay. In my case, pananglitan, retired na, wala na’y opisina, busa, wala’y klaro nga lakaw, kon duna man. Isip senior citizen, lahi ang akong lakaw kay sa akong mga anak. Busa, dili g’yud mi magkadungan paglakaw. Ug kining giingon nilang alternative route, dinhi sa atong dakbayan, asa man ni dapit? Dili ba libaongon? Dili ba puno sa nag-park nga mga sakyanan? Dili ba ngitngit? Aspaltado o kongkreto ba?

In my case, sagad ako ra man usa ang sakay, mamasahero na lang ko aron duna ko’y kauban sa kotse? Ug kon pananglitan, ang alternative route layo kaayo sa akong padulngan, usik-usik lang ko’s gasoline ug panahon?

Hinaot nga kining nahunahunaan sa Manila, dili awaton sa atong mga traffic enforcer dinhi. Tingali’g magpa-bright-bright sab unya ni sila!

* * *

Duha ka dagkong opisyal sa gobiyerno ang gipalagpot ni Presidente Digong Duterte gumikan sa kapakyas pag-implementar sa usa ka proyekto.

Dinhi sa ato, mao ra man og duna sab ta’y mga proyekto nga kutob lang sa estorya, apan wala’y lihok?