EDITORYAL - Palpak ang transport strike

Wala man tuod makaparalisar ang nationwide transport strike sa Pinagkaisang Samahan ng mga Tsuper at Operator Nationwide (PISTON) kagahapon, apan daghan gihapon ang naapektohan niini, partikular na ang mga drayber sa mga sakyanang pasaheroan. Tungod kay wa’y klase ug wa’y trabaho sa mga buhatan sa gobiyerno, dakong pahat sa mga sumasakay ang wala sa kadalanan kagahapon. Ang resulta, menos ang mga pasahero.

Ang reklamo sa PISTON mao kining Public Utility Vehicle Modernization Program (PUVVMP) nga planong ipatuman sa gobiyerno nga ang tumong naglakip sa pagpatuman na sa 15-year road limit niining mga sakyanang pasaheroan, apil ang PUJ. Apan ang mga sakop sa PISTON, bisan sa pagpasabot, padayong nipasiatab nga ang plano sa gobiyerno mao g’yud ang pag-phase out sa mga jeepneys .

Nagduda usab sila nga ang plano sa gobiyerno mao ang pag-monopoliya sa transport sector sa nasud pinaagi sa paghatag og pabor sa mga dagkong korporasyon ug sila nahadlok nga makulban og kaldero. Lehitimo kaayo ang ilang kabalaka batok sa PUVVMP, apan dili man tingali maayo kon ipaagi nila kini sa karsada ang protesta kay imbes nga makakuha sila og simpatiya, maglagot na hinuon kanila ang mga sumasakay.

Kinahanglan g’yud nga ipatuman ang PUVMMP kay daghan pa gihapong mga kagangkagang nga mga jeepneys nga nagbiyahe, ug nagbuga na og itom ug makadaot sa panglawas nga aso, ug peligro kaayo sa katawhan. Ang maayong buhaton mao nga magbantay ang tanan, apil na ang mga sumasakay, nga sa pag-moderno sa sistema sa transportasyon sundon ang nalatid sa balaod nga ang gobiyerno kinahanglang mohatag og luwas, epektibo ug barato nga transport system alang sa publiko.

Usa niini mao ang pagpatuman sa 15-year limit, paggamit og light rail transit, Bus Rapid Transit ug regulasyon sa mga transportation network vehicle service (TNVS)  sama sa Grab, Uber ug kining Angkas. Dinhi nga dapita, kinahanglang mamuhonan ang mga transport groups, imbes nga magsige og strike kay wa na man kaayo’y magtagad niini.