Panghilam-os sa bakak
Human sa mga diskurso ni Presidente Rodrigo Duterte, nga mahitabo hapit matag adlaw ug may mga higayon gani nga duha ngadto sa tulo ang iyang mga pakigpulong sa usa lang ka adlaw, magkapuliki ang mga sakop sa iyang gabinete sa paghubad unsa ang tinuod niya nga gipasabot.
Kasagaran sa ilang hubad nisukwahi sa mga gipanulti sa presidente. Bisan sa pahimatngon sa iyang mga tigpamaba sa kamahiligon ni Presidente Duterte sa paggamit og mga pulong nga makapaukyab, motumaw gihapon ang bakikaw nga kalibog kon unsa ang mas katuohan: Ang hubad o ang aktuwal niyang sulti?
* * *
Nasubli ang kaapiki sa Malakanyang sa pakigpulong ni Presidente Duterte sa niaging semana nga nilab-as sa masuk-anon niya nga pamalikas sa United Nations (UN), nga iyang gihagit pagpalagpot sa Pilipinas isip sakop, ug sa European Union (EU), kansang mga embahador iyang gipalayas.
Mas bakikaw ang katin-awan sa mga tigpamaba sa presidente kay (1) wa’y nag-awhag nga palagputon ang Pilipinas gikan sa UN, kon dili, igo lang gipasidan-an nga mahimong matangtang gikan sa UN Human Rights Commission (UNHRC) tungod sa extrajudicial killings; ug (2) wa mopasidaan og silot ang EU, kon dili, ang pipila lang ka opisyal nga nanganhi aron pagsusi sa EJKs.
* * *
Mas makapabalaka ang wa’y lipud-lipod nga pagpanghimakak sa Department of Foreign Affairs (DFA) sa pangangkon ni Duterte nga gipabalibaran niya ni Finance Secretary Sonny Dominguez ang $18 milyones ngadto sa $20 milyones nga hinabang gikan sa United Kingdom.
Matud sa DFA nga wa’y bag-ong hinabang nga gitanyag ang UK, ug wa’y gibalibaran ang Pilipinas nga hinabang sa UK, labi na ang para sa Mindanao. Gipul-an na ba si Foreign Affairs Secretary Alan Peter Cayetano og hapyud-hapyod sa sayop nga mga sulti sa presidente?
* * *
Dihang niangkon si Duterte nga gituyo niya pagpamakak sa bank accounts ni Senador Antonio Trillanes aron lang paghasol sa higpit niyang kaatbang, mahimo ra nga sabton nga kabahin ang pagpakatap og sayop nga kasayuran tungod sa hilanat sa politika.
Apan kon gawas sa panginsulto ug pamalikas, mopakatap siya og sayop nga mga pasangil batok sa UN, EU, UK ug ubang kanasuran, kitang tanan ang manlipaghong sa kauwaw atubangan sa kalibutan.
* * *
- Latest
