EDITORYAL – Transport Strike

Ang mga PUJ drayber nga sakop sa PISTON mihulga nga dili sila mamasahero karon ug ugmang adlawa aron subli nga protestahan ang plano sa kagamhanan nga wad-on na ang mga karaang public utility vehicles nga subra na sa 15 ka tuig. Tungod niini, napugos ang Malacañang sa pagmando nga wala’y trabaho sa mga opisina sa kagamhanan ug suspendido ang klase karong adlawa sa tanang level sa public ug private elementary ug high school sa tibuok nasud.

Ngano man nga kon may yangungo ang mga PUJ driver ngadto sa kagamhanan, ang mga sumasakay man dayon maoy ilang sakripisyuhon? Angay na g’yud nga ang kagamhanan, pinaagi sa Land Transportation Franchising and Regulatory Board (LTFRB) mopakita na nga aduna sila’y gahum pagsilot sa mga tag-iya og sakyanan nga mosalmot sa transport strike. Hinoon, dali ra nga maghimo og rason ang mga transport operators nga samtang gusto sila nga modagan ang ilang mga sakyanan, apan wala’y momaneho niini.

Kon padayon nga wala’y ngipon ang LTFRB ug ang Land Transportation Office (LTO) pagsilot sa mga mosalmot sa strike, kataw-an ra sila kanunay sa mga welgista ug dili g’yud mahadlok nga mopahigayon og transport strike. Makatarunganon ang kagamhanan nga dili na tugotan ang mga karaang sakyanan sa pagpamasahero, kay naglantaw sila sa kaluwasan sa mga sumasakay.

Kinahanglang masuko na gayud ang katawhan sa sagad himoon sa mga drayber nga molusad dayon og transport strike kon aduna sila’y demanda sa kagamhanan ug ang sakiton mao ang mga sumasakay.

Buyno, kon gusto g’yud ang mao nga mga drayber nga mohimo og transport strike, himoon nila kini dili kay duha lang ka adlaw. Mas nindot nga paabton nila og usa ka buwan.