EDITORYAL - Libre gikan sa kahasol

Maayo tingali nga i-review sa mga konsehal sa dakbayan sa Sugbo kining kontrata kabahin sa pag-abang og 11 ka mini-compactor trucks ug 10 ka mini-dump trucks aron gamiton paghakot sa mga basura gikan sa kabarangayan paingon sa garbage transfer station sa Barangay Inayawan. Angay pud tingali apilon pag-review kining sistema nga ang basura sa mga barangay gikan sa north district, dad-on pa sa garbage transfer station sa Inayawan, dayon hakuton na usab padulong sa landfill sa Consolacion. Dili ba kini nagdoble-doble lang sa gastos sa siyudad?

Ang Pamocor maoy nakadaog sa bidding nga mopaabang og mga mini-compactor ug mini-dump trucks nga tag P700 kada oras sa pagkolekta og basura, 24-oras gikan sa mga barangay. Tan-aw sa mga konsehal sa oposisyon nga alkanse ug modako hinuon ang gastohan sa siyudad kon mangabang, ug mas maayo pa nga mopalit og kaugalingong garbage truck ang dakbayan. Sa tag P700 nga abang matag oras alang sa 21 ka garbage truck, makabayad ang siyudad og P352,800 kada adlaw; o kapin sa P10.5 million kada buwan. Ang kontrata sa Pamocor nagsugod Oktubre 1 ug matapos karong Disyembre 31, ug mogasto ang siyudad og kapin sa P31 milyones.

Ang kantidad sa usa ka mini-dump truck ug mini-compactor truck dili moabot og P2 milyones kada usa. Busa, mas maayo pa nga ang gastuhon sa pag-abang, ipalit na lang sa mao nga mga units kay mapanag-iya pa kini sa siyudad. Hinuon, may bentaha ang siyudad niini kay wa na’y hasol sa maintenance ug pagpasweldo og drayber kay ang Pamocor na man maoy moabaga niini. Libre ang siyudad sa kahasol, apan dako ang gasto.

Wa man sab hinuon mohatag og kwentada ang oposisyon kon pila kaha ang magasto sa maintenance ug sweldo sa drayber kon ang siyudad maoy mamalit niining mga ekipo. Maayo g’yud nga i-review kini nga kontrata aron sa sunod, may ideya na ang mga opisyal kon unsa’y tukma nga buhaton.