Makiha ang tawo nga mopalit og kinawat

Dear Atty. Divine,

 Ang among balay gilungkab ug nakuha ang mga cellphone ug laptop. Akong gipa-blotter  sa police ang hitabo ug sa ilang gihimong follow-up operation, nadakpan ang suspek.

Mitug-an ang suspek nga siya ang nagkawat, ug ang cellphone ug laptop iyang gibaligya. Naa kuno siya’y suki nga mopalit sa iyang mga kinawat.

Ako na nga gikiha ang suspek apan gusto nako nga iapil og kiha ang komprador sa iyang kinawat. Unsa’y kaso nga akong i-file batok kaniya? Daghang salamat. — Gina

 Dear Gina,

Mas maayo g’yud nga imong ikiha og apil ang nagpalit sa mga kinawat nga cellphone ug laptop kay usa ka kalapasan sa Anti-Fencing Law ang iyang gibuhat.

Base sa maong balaod, pahamtangan og silot ang si bisan kinsa nga mapamatud-an nga mopalit sa butang nga kinawat kay hugtanon kini nga gidili sa balaod.

Mosiaw man gud ang kawat kon dunay mga tawo nga kabaligyaan nila sa ilang kinawat. Busa ang maayo nimo nga buhaton mao ang pag-ila kon kinsa kining tawhana ug imong sultian ang polis nga iapil nimo kini sa pagkiha aron paghatag kaniya og leksyon. Thanks and God Bless.  —Atty. Divine

 Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkukes, Sabado ug Domingo.